“Vaşinqton”un rusiyalı hücumçusu Aleksandr Oveçkinin atasının sağlıq durumuna görə qəfil vətənə döndüyünü xəbər vermişdik.

Çərşənbə günü axşam saatlarında Mixail Oveçkin 71 yaşında dünyasını dəyişib. Ulduz hokkeyçi atasının ölümü ilə bağlı ictimaiyyətə müraciət edib: “Bu gün atam dünyadan köçdü... Hamıya dəstəyə görə minnətdaram, ancaq anlayışla yanaşmağınızı və ailəmiz üçün belə çətin vaxtda bizi narahat etməməyi də xahiş edirəm. Sağ olun”.

Mixail Oveçkin yanvarın 10-da xroniki xəstəliyin - aşındırıcı anevrizmin (ürək divarının şişkinlik şəklində qabarması – red.) güclənməsi üzündən xəstəxanaya aparılmışdı. Həkimlər müayinə zamanı onda bədxassəli şiş də aşkarlayandan sonra ixtisaslaşdırılmış xəstəxanaya köçürmüşdülər.

Buz üzərində yaşananlara gəlincə, “Edmonton”un hücumçusu Konnor Makdevid komandasının “Detroyt”a uduzduğu oyunda iki məhsuldar ötürmə ilə yadda qaldı. İndi onun hesabında cari mövsümdə keçirdiyi 55 oyunda 99 (42+57) xal var. Bu isə 1992/93 mövsümündən bəri MHL-də 6-cı göstəricidi. Son 30 ildə mövsümün ilk 55 oyununda ən azı 98 xal toplayan hokkeyçilərin sayı 5-ə bərabərdi. Bunlar Mario Lemye (1992/93 mövsümündə 147, 1995/96 mövsümündə 131 xal), Konnor Makdevid (2020/21 mövsümündə 104, 2022/23 mövsümündə 99 xal), Yaromir Yaqr (1995/96 mövsümündə 103 xal), Pet Lafonten (1992/93 mövsümündə 100 xal) və Ueyn Qretskidi (1993/94 mövsümündə 98 xal).