Müqavilə ilə “Atalanta”ya məxsus olan və icarə əsasında “Marsel”in şərəfini qoruyan Ruslan Malinovski ilə bağlı xəbər var.

Ukraynalı futbolçu Liqa-1-in son turunda səfərdə “Klermon”la qarşılaşmada (2:0) 90 dəqiqə meydanda oldu. 36-cı dəqiqədə onun yerinə yetirdiyi cərimə zərbəsi zamanı top qapının çox üstündən keçdi. İngilisdilli “Bein Sports” kanalının ingiltərəli şərhçisi Fil Şoen canlı yayında bu epizodu belə şərh etdi: “Rusiyalı futbolçunun zərbəsindən sonra top az qala Moskvaya qədər gedib çıxdı”. Şərhçinin bu sözləri Malinovskinin həyat yoldaşının kəskin narazılığına səbəb olduğundan bu xanım səhifəsində “bu nə danışır? Belə savadsız şərhçilər bu cür oyunlara buraxılmamalıdı” ifadəsini yazdı. Matçın ardından Malinovski “tvitter”dən Fil Şoenə müraiət edərək ondan izahat tələb etdi. Şərhçinin cavabı belə oldu:

Görünür, şərhçinin bu cavabı Malinovskini qane etmədi. 29 yaşlı yarımmüdafiəçi ona belə cavab verdi: “Mən heç bilmirdim ki, Fransada buraxılan qaz Floridaya qədər gedib çıxa bilər. Canlı yayında səhv etmisizsə, istərdim ki, üzrxahlığı da “tvitter”də yox, növbəti canlı yayında edəsiz”. Qeyd edək ki, “Klermon” – “Marsel” oyunu stadionun ətrafında iki klubun fanatları arasında yaşanan çaxnaşma üzündən 50 dəqiqə gec başlamışdı. Polislər aranı sakitləşdirmək üçün gözyaşardıcı qazdan istifadə etməli olmuşdular. Həmin qaz stadionun tribunalarına qədər gedib çıxmışdı.

Maraqlıdı ki, bir müddət öncə Malinovski özü də buna bənzər bir məsələyə görə üzr istəməli olmuşdu. Yanvarın 28-də keçirilən “Marsel” – “Monako” oyununun final fitindən sonra o, rəqib komandanın rusiyalı yarımmüdafiəçisi Aleksandr Qolovinlə gülərüz şəkildə qucaqlaşdığı üçün həmyerlilərinin qəzəbinə tuş gəlmişdi. Çox keçmədən Malinovski bu hərəkətinə görə ukraynalılardan üzr istəmiş, bunu ani diqqətsizlik adlandırmış və “kaş ki, həmin an onun yanından ötüb gedəydim” ifadəsini yazmışdı.