Rəşad Sadıqov: “Gündə bir qayda dəyişir, bilmirsən, nə fikirləşəsən”
Misli premyer-liqasında 20-ci tura yekun vurulub.
“Neftçi” “Zirə”ni məğlub edib - 1:0. Oyundan sonra qəsəbə təmsilçisinin çalışdırıcısı Rəşad Sadıqovun mətbuat konfransı keçirilib. Sizi mütəxəssisin fikirləri ilə tanış edirik:
“Oyun planlaşdırdığımız kimi keçirdi. Rəqibə pressinq tətbiq etmək və topa nəzarət edib, hücumlar qurmaq istəyirdik. Oyun üstünlüyümüzlə keçirdi, rəqibin təhlükəli epizodu da yox idi. Künc zərbəsindən qol buraxdıq. Bu, rəqibin üstünlüklərindən idi. Sona qədər mübarizə aprdıq. Azlıqda qalsaq da, cəhdlərimiz oldu. Qələbə qazanmaq istədiyimiz matçda uduzduq. “Neftçi”ni təbrik edirəm”.
- Geryenin ikinci sarı vərəqə almasından sonra hakimi alqışladız. Artıq onlara sözünüz qalmayıb?
- Sualım var idi. Müəyyən qədər izah olundu. Qaydaların necə olduğunu bilmirəm. Sarı vərəqəyə görə hakim VAR-a çağırılmır. Belə epizod olmuşdu. Onda qırmızı vərəqəyə görə çağırmışdılar, sarı gördü. Burada ofsayd var idi və epizod sarı vərəqəlik idi. Hakimin niyə çağırıldığını anlamadım. VAR-da gündə bir qayda dəyişir, bilmirsən, nə fikirləşəsən. Yəqin ki, izahı olacaq. VAR-la bağlı çox suallar var. Hamdauinin epizodunda isə penalti verilməli idi. Buna etiraz edirdim. Hamdauinin ayağına zərbə var oldu. Nədənsə VAR susdu.
- 3-cü yerdən bir az da uzaqlaşdız. Növbəti oyunlarda itirilən xalları bərpa etmək çətin olmayacaq?
- Hər komandanın müəyyən hədəfi olur. Bizim hədəfimiz kubok və ya ilk “4-lük”lə Konfrans Liqasına vəsiqə qazanmaqdı. “Neftçi” və “Qarabağ”la rəqabət aparmaq çətindi. “Sabah” da əla mövsüm keçirir. İlk “4-lük” uğrunda mübarizə aparırıq. Kubokda baş verənlər Konfrans Liqasında getməyimizi təhlükə altına qoydu. Bu gün qələbə qazanmaq istəyirdik. Qarşıdakı oyunlarda da bunun üçün çalışacağıq. 4-cü yeri də qorumağa çalışmalıyıq. Oyun planında futbolçularımdan razıyam. Müəyyən xırdalıqlar çatışmır. Yolumuza davam edəcəyik. Oyun planında da müəyyən dəyişikliklər etmək istəyirik. Gələn mövsümü də fikirləşirik ki, o rəqabətə hazır olaq.
- Bu mövsüm komanda 6 qırmızı vərəqə alıb.
- Bunu ehtiyatsızlıq kimi dəyərləndirərdim. Nizam-intizamla bağlı deyil, oyun epizodlarında alınan vərəqələrdi. Bir az daha ehtiyatlı olmaq lazımdı. Bircə Coşqun Diniyevin vərəqəsi intizamsızlıq kimi dəyərləndirilə bilər, amma onun da “qırmızı” olmadığı aydınlaşdı. Azlıqda qalmaq xoş deyil, ehtiyatlı olmaq lazımdı.
- Hakimlər Gerye ilə bağlı vərəqəni necə izah etdilər?
- Açığı, başa düşmədim koridora gedəndə baş hakim bildirdi ki, VAR-a getməyi doğru idi. Ancaq mən anlamadım.
