“Sumqayıt” – “Turan Tovuz” matçından əvvəl bir nəfər polisə yaxınlaşıb əcnəbi dildə nəsə dedi.

Football-plus.az xəbər verir ki, asayiş keşikçisi qarşısındakının nə söylədiyini başa düşmədiyindən ətrafdakılardan kömək istədi.

Yaxşı ki, həmkarımız Ayaz Qurbanov həmin an orda idi. Qonağa yaxınlaşan Ayaz onunla danışandan sonra Almaniyadan gəldiyini və idman jurnalisti olduğunu bildirdi. Fürsətdən istifadə edib Feliks Hofman adlı alman jurnalistlə söhbətləşdik.

- Sumqayıta gəlişinizin səbəbini bilmək istərdik.
- İlk dəfədi ki, Azərbaycana səfər edirəm. Sizin ölkə çempionatını izləmək istədim. Mənə komandalarınızı meydanda görmək çox maraqlıdı.

- Turnir cədvəlinin üst pillələrində qərarlaşan komandaların oyununu yox, ikinci “beşlik”də yer alan kollektivlərin qarşılaşmasını izləməyə qərar verməyiniz bizə qəribə gəldi...
- Məqsədim Avropanın bütün ölkələrini gəzmək və yerli oyunçular barədə məlumat toplamaqdı. Özüm üçün yazı materialı hazırlayıram. Bu günə kimi qitənin 45 ölkəsində olmuşam. Azərbaycandan öncə Macarıstana yollanmışdım. Budapeştdən Bakıya gəldim.

- Konkret əməkdaşlıq etdiyiniz mətbu orqan var?
- İnternet forumum var. Orda Avropa futbolu barədə çox müzakirələr olur. Əsasən bloger kimi fəaliyyət göstərirəm. Onu da qeyd edim ki, izləyicilərimin sayı yetərincə çoxdu. Arada yazılarım Almaniyanın aparıcı idman mediasında da dərc olunur.

- Belə başa düşdüm ki, Qafqaza ilk dəfə səfər edirsiz.
- Bu Qafqaz ölkələrinə ilk səfərimdi.

- Azərbaycanda futbol sahəsində çalışan dost-tanışınız var?
- Nə tanışım, nə də dostlarım var. Mən tək işləyirəm və istədiyim ölkəyə də yollanıram.

- Azərbaycan futbolu barədə hansı məlumatlara sahibsiz?
- Açığı, o qədər də geniş bilgim yoxdu. Yalnız “Qarabağ”ı tanıyıram. Komandanız Avropa Liqasında “Frayburq”la eyni qrupda yer aldığından klubun keçmişi və bu günü ilə bağlı məlumat toplamışam. Yeri gəlmişkən onu da qeyd edim ki, təmsilçiniz hər iki oyunda “Frayburq”a əsl başağrı oldu.

- Azərbaycanlı futbolçulardan kimisə tanıyırsız?
- Səmimi deyim ki, yox. Bura gəlişimin məqsədi sizin futbolçuları tanımaqdı. İnciməyin, Avropada azərbaycanlı futbolçular haqda informasiya sıfır səviyyəsindədi.

- Başqa hansı oyunları izləmək fikriniz var?
- Çatdırsam, sabah daha bir qarşılaşmanı izləmək istəyirəm. Hələ qərar verməmişəm. Azərbaycana səfərim cəmi 2 günlük nəzərdə tutulub.

- Səfər xərclərinizi kim qarşılayır?
- Özüm (gülür). Bloger kimi qazanıram və onun da bir hissəsini səfərlərə xərcləyirəm. Səfərlər olmasa, yazdıqlarımı oxuyan da olmaz.

RƏŞAD