Beynəlxalq Futbol Tarixi və Statistikası Federasiyası (BFTSF) klublar üzrə 2022-ci ilin ən yaxşı baş məşqçisinin adını açıqlayıb.

Football-plus.az xəbər verir ki, nəticə təəccüb doğurmayıb.

Qurumun saytının yaydığı məlumata görə, bu nominasiyada “Real”ın çalışdırıcısı Karlo Ançelotti qalib gəlib. Onun komandası ötən il Çempionlar Liqasının və La Liqanın qalibi olmuşdu.

63 yaşlı mütəxəssis bu mükafatı karyerası ərzində 3-cü dəfə qazanıb. BFTSF-nin reytinq cədvəlində 2-ci yeri “Mançeser Siti”ni növbəti İngiltərə çempionuğuna daşıyan Xosep Qvardiola, 3-cü yeri isə Valid Reqraqi tutub. Qeyd edək ki, Reqraqi avqustun 1-də Mərakeş yığmasına təyinat almazdan əvvəl yerli “Vidad”la Afrika Çempionlar Liqasının qalibi olub.

Ötən ilin ən yaxşı klub mütəxəssislərinin siyahısında 4-cü yerə “Liverpul”un baş məşqçisi Yürgen Klopp layiq bilinib.