1-ci divizionun cari mövsümündə "Zaqatala" əsasən ev komandası kimi diqqət çəkdi. Komandanın aparıcı futbolçularından biri də Roini İsmayılovdu.
Onunla həm özü, həm də "Zaqatala"nın çıxışıyla bağlı danışdıq.

- Futbola necə başladın?
- 2004-cü ildə Gürcüstanda yaşayırdım, ordakı futbol turnirlərinə qoşuldum. 2008-dən isə "Simurq"un uşaq qruplarında davam etdim.

- Hansı kluba azarkeşlik edirsən?
- Uşaqlıqdan "Çelsi"yə azarkeşlik edirəm. Özümüzdən isə "Qarabağ"ın oyunu xoşuma gəlir. Ağdam təmsilçisi Azərbaycanda bütün komandalardan bir baş üstündü. Çox gözəl oyun sistemləri var.

- Pərəstiş etdiyin futbolçu kimdi?
- Uşaqlıqdan Frenk Lamparda simpatiyam olub.

- Bəs peşəkar karyerana necə qədəm qoydun?
- 2011-ci ildə "Simurq"un əvəzedicilərinə cəlb olundum. 2012-də zədələndim və 8 ay futbolsuz qaldım. 2014-cü ildə "Revan"a transfer oldum. 6 ay orda çıxış etdikdən sonra "Neftçala"ya keçdim. Bölgə təmsilçisində cempion oldum. Lakin "Neftçala"nı elitaya buraxmadılar və komanda fəaliyyətini dayandırdı. Sonra "Zaqatala"dan dəvət gəldi. Mən də təklifə müsbət cavab verdim.

- "Zaqatala" xeyli vaxtdı 1-ci divizionda çıxış etsə də, hələ ki elitaya yüksəlməyib. Nə vaxtsa premyer-liqaya çıxacağınıza inanırsan?
- "Zaqatala" ilə 1-ci divizinoda 2-ci və 3-cü yeri tutsaq da, yüksək liqaya adlaya bilməmişik. Bu bizi üzür. "Neftçala"da çempion olsaq da, müxtəlif bəhanələrlə komandamızı elitaya buraxmadılar. Şükürlər olsun ki, "Zaqatala" hələ də fəaliyyətini davam etdirir. Burda yerli cavan, perspektivli oyunçular var. İnanırıq ki, gec-tez "Zaqatala" elitada oynayacaq.

- Karyeranda ən uğurlu mövsüm hansı olub?
- Hər mövsümdə kiçik uğurlar qazanmışam. Amma 2019/20-ni daha uğurlu sayıram. Həmin dövrdə komandamız cempionluğa gedirdi. Lakin karantin oldu və cempionat yarımçıq qaldı.

- Əvvəlki illərdə heyətinizdə Aleksandr Şemonayev kimi təcrübəli futbolçu vardı. Onun yoxluğu hiss olunur?
- Əlbəttə, Aleksandr Şemonayevin yeri görünür. Karyeramda birgə çıxış etdiyim ən təcrübəli və peşəkar oyunçu elə Saşa olub. Yaşına baxmayaraq, o məşqlərə hamıdan tez gəlib, gec də gedirdi. Həm futbolçu, həm də insan kimi bizimlə təcrübəsini bölüşürdü, hamıya əlindən gələn köməyi edirdi. Həqiqətən də Saşa kimi təcrübəli oyunçuya ehtiyacımız var.

- Cari mövsümdə komandanın və özünün çıxışını necə qiymətləndirərdin?
- Daha yaxşı ola bilərdi. Daha çox ev komandası kimi xarakter göstəririk. Doğma publika önündə daha yaxşı çıxış edirik və ilk dövrədə azarkeşlərimiz qarşısında məğlubiyyətimiz yoxdu. Səfərdə istədiyimiz kimi çıxış edə bilmirik. Ona görə də ən çox xal itkilərinə məhz səfər matçlarında məruz qalmışıq. Bundan başqa heyətimizdə zədəlilər də çox idi. İnşallah, 2-ci dövrədə daha yaxşı olacağına inanırıq.

- Mövsümün 1-ci yarısında cəmi 2 qol vurdun. Fasilədən sonra daha çox qol vurmağı düşünürsən?
- Açığı, qarşıma çox qol vurmaq hədəfi qoymamışam. Əsas komandama maksimum fayda verməkdi.

- "Zaqatala"da və 1-ci divizionda yeganə inqiloy sənsən?
- Hazırda tək inqiloy mənəm. İnşallah, növbəti illərdə çox olarıq (gülür).

- İnqiloylar arasında pərəstişkarların çoxdu?
- Pərəstişkar yox, amma izləyicilərim var. Hər birinə təşəkkür edirəm.

ABDULLA İSMAYILOĞLU