Türkiyənin 2-ci liqasının, yəni 3-cü divizionunun ağ qrupunda oynanılan bir qarşılaşmada üzücü hadisə yaşanıb.

Football-plus.az xəbər verir ki, söhbət “24 Ərzincanspor” – “Esenlər Erokspor” matçından gedir.

Dekabrın 11-də keçirilən və 1:1-lik bərabərliklə yekunlaşan oyunun 85-ci dəqiqəsində tribunadan matçı izləyən fanatlardan birinin halı birdən-birə pisləşib.

Həmin an oyunu Ərzincan xəstəxanasının baş həkimi Ufuk Kuyrukluyıldız da tribunadan izləyirmiş. Həm o, həm də “24 Ərzincanspor”un tibbi personalı həmin fanata yardım etməyə çalışıblar. Amma onların tibbi yardım maşınına və içindəki ləvazimatlara ehtiyac duyduğu məlum olub. Bu an həm tribunadakı fanatlar, həm də “24 Ərzincanspor”un rəsmiləri matçın dayandırılması və tibbi yardım maşının meydanın içindən keçərək həmin tribunaya tərəf yönəlməsi üçün hakimlərə müraciət etməyə çalışıblar. İşin ən qəribə tərəfi odu ki, nə 4-cü hakim, nə yan xətt hakimi, nə əsas hakim, nə də federasiya nümayəndələri bu tələbə qarşılıq veriblər. Onlar oyunun davam etməsinə qərar verərək tibbi yardım maşınının meydana çıxmasına mane olublar! Nəticədə həmin bəxtsiz azarkeş yalnız final fitindən 20 dəqiqə sonra yaxınlıqdakı xəstəxanaya çatdırılıb. Amma həkimlərin bütün səyinə baxmayaraq, onun həyatını xilas etmək mümkün olmayıb.

“24 Ərzincanspor” məsələni ictimailəşdirərək öz rəsmi saytında bəyanat yerləşdirib. Həmin bəyanatda insan sağlamlığının hər şeydən öndə gəldiyi xatırladılaraq hakimlər briqadasının hərəkəti şiddətli şəkildə qınanılıb. Buna bənzər hadisə bir neçə ay öncə İspaniyada yaşanarkən orda tam fərqli görüntülərin şahidi olmuşduq. Sentyabrın 10-da La Liqanın 5-ci turu çərçivəsində keçirilən “Kadis” – “Barselona” matçı (0:4) tribunada bir azarkeşin özünü pis hiss etməsi və ürəyi ilə bağlı problem yaşaması üzündən 80-ci dəqiqədə dayandırılmışdı. Hakimlər və futbolçular paltardəyişmə otağına yollanmış və nəticədə oyunda 45 dəqiqəlik fasilə yaranmışdı. Sonradan oyun qaldığı yerdən davam etdirilmişdi. “24 Ərzincanspor” artıq məsələ ilə bağlı Türkiyə Futbol Federasiyasına rəsmi şikayət ünvanlayıb. Məsələnin araşdırılmasını və günahkarların cəzalandırılmasını tələb edən klub bu olayı sona qədər təqib edəcəyini açıqlayıb. Ürəktutmasından dünyasını dəyişən azarkeşə gəlincə, məlum olub ki, bu, 67 yaşlı təqaüddə olan müəllim Turqay Ərəndi. O, uzun illər “24 Ərzincanspor”un fanatı olub və dəfələrlə komandanın ev oyunlarına gəlibmiş.