“Neftçi”nin yüzminlərlə azarkeşi üçün dünən adi gün – mənə elə gəlir ki, komandası meydana çıxmayan gerçək azarkeşlər üçün qalan bütün günlər adidi! – idi.

Amma məhz noyabrın 30-da, sadəcə, 56 il əvvəl Bakıda elə möhtəşəm hadisə baş verib ki, ağ-qara rənglərə könül verənlər illərdi onun istisinə qızınır, xəyalları ilə məst olurlar. Əlbəttə, söhbət “Neftçi”nin birinci və sonuncu dəfə SSRİ çempionatında bürünc medal qazanmasından gedir. “Ağ-qaralar” paytaxtda “Spartak”ı qəbul edirdi...
Əslində o medal bürünc yox, gümüş olmalıydı, “Neftçi” 2-ci yeri tutan Rostov OİK-ini səfərdə də məğlub etmişdi, evdə də. Tarixdə isə qarşılıqlı oyunların hesabı yox, nəticə qalır. Əlahəzrət nəticə SSRİ çempionatının həmin mövsümünü OİK-in 47, “Neftçi”nin 45 xalla bitirdiyini diqtə edir.

Bakılıların yeganə “bürünc”ünə bütün bu illər ərzində içdən və çöldən o qədər çamur atıblar ki, adam bəzən bu mövzuya müraciət etməkdən çəkinir. Amma bu mənim şəxsi fikrimdi ki, Azərbaycanda təkcə ötən əsrin 60-cı yox, 80-ci illərində də medal qazanmağa qadir komanda var idi. Təəssüf ki, 8-ci onillikdə ən yüksək nəticə 9-cu yer oldu. Həmin dövrdə futbolumuza rəhbərlik edənləri işbazlıqda, nəticələri yaşıl meydandan kənarda müəyyənləşdirməkdə suçlayanlara isə bir cavabım var: əlbəttə, bizimkilərin də hansısa cəhdə al atması mümkündü. Ancaq görünür, “xalçaaltı oyunlar”ı nəinki ruslar və ukraynalılar, heç gürcülərlə ermənilər qədər də bacarmamışıq ki, nəticələrimiz belə miskin görünür.

Müstəqillik dönəminin “Neftçi”si qrupa düşdü, ardından “Qarabağ” estafeti ələ aldı və artıq 9 ildi şərəflə daşıyır. “Qarabağ”ın ardıcıl uğurları təkcə futbol Avropasına yox, vaxtilə bizi bəyənməyən, uğurlarımıza xor baxan postsovet məkanına da özünəməxsus mesajdı. Kor gözünüzü açın və görün ki, azərbaycanlılar da futbol oynamağı bacarır, özü də yetərincə yüksək və sizin çata bilmədiyiniz səviyyədə!

Noyabrın 30-cu gününün eşqi ilə “Neftçi”yə və “Spartak”a aid ən etibarlı qaynaqlara da baş vurdum ki, yeni nəsə tapım. “Neftçi”nin 70 illiyinə həsr olunan, 2007-ci ildə ışıq üzü görən kitabda bakılıların “Spartak”la həlledici oyununu 45 min azarkeşin izlədiyi göstərilib. Təsəvvür edirsizmi, 37 min yerlik stadion bundan 8 min artıq adamı həmin gün “qoynuna alıb”, yəni bütün ara keçidlər, sektorların üstü, tribunaların altı da tutulub. Maraqlıdı ki, “Spartak”a aid ensiklopedik kitabda da azarkeş sayı 45 min göstərilir. Və o kitabda bu sözlər də yer alıb:

...Janrın tələbinə uyğun olaraq, həmin son oyunda – düz 56 il əvvəl “Neftçi”nin ağ-qara formasını geyən heyəti də xatırladıram: Sergey Kramarenko, Nikolay Boqdanov, Vladimir Bruxti, Yaşar Babayev, Aleksandr Trofimov, Vyaçeslav Semiqlazov, Kazbek Tuayev, Anatoli Qryazev (Mübariz Zeynalov, 76), Anatoli Banişevski, Eduard Markarov, Valeri Hacıyev.

ORXAN