Mircavadov Abdullayevin yığmaya gəlişinin faydalı olacağını düşünür
AFFA-nın Məşqçilər Komitəsinin üzvü Ağasəlim Mircavadov bir müddət öncə qəzetimizə açıqlamasında milli komandada daha bir yerli mütəxəssisin çalışmasını təklif etdiklərini söyləmişdi.
Bilindiyi kimi, hazırda Canni de Byazinin korpusunda iki həmyerlimiz yer alıb. Söhbət Arif Əsədovdan və qapıçılarla işləyən Kamran Ağayevdən gedir.
Redaksiyamıza daxil olan məlumata görə, U-17-nin baş məşqçisi Elxan Abdullayev De Byazinin köməkçisi olacaq. Amma hələ ki bu məsələ rəsmi təsdiqini tapmayıb. Elə dünən əlaqə saxladığımız Mircavadov da konkret fikir söyləmədi:
"Elxan Abdullayevin təyinatı ilə bağlı bizdə dəqiq məlumat yoxdu. Təyin olunsa belə, buna sevinərik. Elxan savadlı mütəxəssisdi. Həm yığmalarımızda, həm də klublarda çalışıb. Prosnieçkinin dönəmində köməkçi məşqçi olub. Odu ki, onun təyinatının komandaya faydalı olacağını düşünürəm".
ABDULLA İSMAYILOĞLU
Digər xəbərlər
