Hazırda 1-ci divizionda mübarizə aparan və doğma meydanda mübariz oyunu ilə seçilərək uduzmayan komanda "Zaqatala"dı.

Bölgə təmsilçisinin diqqəti çəkməsinin bir başqa səbəbi isə futbolçusunun çempionatın bombardirləri siyahısında yer almasıdı. Söhbət 20 yaşlı Cəlal Cəbrayılovdan gedir. "99 nömrə" 11 turdan sonra 9 qolla bombardirlərin yarışında "Araz Naxçıvan"dan Orxan Əliyevlə 1-2-ci yeri bölüşür. Onun bu günlərdə U-21 millimizə dəvət alacağı da gözlənilirdi. Amma...

- "Zaqatala" üçün mövsümün arxada qalan bölümünü necə qiymətləndirirsən?
- Məncə, hazırda bunu etmək bir az tezdi, qarşıda çox oyun var. Amma əsas odu ki, doğma meydanda daha yaxşı çıxış edir, maksimum nəticə üçün döyüşürük. Səfər oyunlarında problemlərimiz olur ki, bunun da üzərində məşqçi heyəti başda olmaqla çalışırıq.

- Divizionun bombardirisən. Bu qədər qol vuracağını gözləyirdin?
- Komandamı bu il dəyişmişəm və müqaviləylə "Sumqayıt"a məxsusam. Bu dəyişikliyin təsirinin olacağını bilirdim. Hələlik bombardir olmağıma köməyi dəyib. Ona görə də “gözlənilməz oldu” deməzdim. Amma “yüz faiz məhz belə olacağını gözləyirdim” desəm, yalan olar.

- Qolları sıralamaqla mövsümü bombardir kimi bitrməyi düşünürsən?
- Mütləq şəkildə bunun və komandamın uğurları üçün çalışıram. Əminəm ki, bacaracam.

- Necə düşünürsən, "Zaqatala" elitaya yüksələ bilər?
- Əlbəttə, belə bir şansımız var. Bunun üçün də mübarizə aparırıq. Gələcəkdə komandada olsam da, olmasam da, çox istərdim ki, "Zaqatala" elitaya yüksəlsin.

- U-21-ə çağrılacağın gözlənilsə də, dəvət gəlmədi...
- Hər kəsin öz vəzifəsi var. Mən futbolçuyam, çıxıb oyunumu oynayıram. Seçimi isə baş məşqçi edir. Açığı, çağrılmadığıma görə məyus oldum. Amma sınmaq da olmaz. Hazırkı tempdə davam etsəm, əminəm ki, bir gün günəş mənim üçün də doğacaq və millidə şans veriləcək. Baş məşqçi Samir Əliyevin qərarına hörmətlə yanaşıram. Milli formanı geymək üçün həmişə hazıram.

- Futbolla yanaşı, ali təhsil də alırsan. Hansı universitetdə oxuyursan?
- ADBTİA-nın tələbəsiyəm. Hazırda bu səbəbdən komandamla məşqlərdə iştirak edə bilmirəm. Akademiya rəhbərliyi güzəşt etmir.

- "Zaqatala" rəhbərliyi necə, sənə güzəşt olunması üçün akademiyaya müraciət edib?
- Məşqçilər və klubun İdarə Heyəti bununla bağlı çox çalışır. Məktub, ərizə göndərilib, amma heç bir güzəşt olunmur. Hətta "Zaqatala" - "Qarabağ-2" qarşılaşmasında çıxış etdiyimə görə dərsə gedə bilmədim. Buna belə güzəşt olunmadı.

- Müqaviləylə "Sumqayıt"a məxsussan. Gələcəkdə "kimyaçılar"ın heyətində uğur qazanmağı, yoxsa legioner həyatı yaşamağı düşünürsən?
- Ayxan Abbasovun baş məşqçi olduğu vaxtlardan əsas komanda ilə məşqlərdə iştirak etsəm də, debüt fürsəti qazanmadım. Əslində ötən mövsüm legioner həyatı yaşamaq üçün variantlar var idi. Amma həm verilən vədlərin yerinə yetirilməməsi, həm də ağır zədələnməyim buna mane oldu. Yaxın gələcək üçün hədəfim "Sumqayıt"da debüt etməkdi.

- Hansı vədlər, kim vermişdi?
- "Şamaxı"da çıxış edə bilərdim. Aleksey Baqa gedişimə mane oldu. Şans verəcəyni dedi, amma olmadı. Bu üzdən dəyişikliyə ehtiyacım olduğunu düşündüm və icarə əsasında "Zaqatala"da oynamaq qərarına gəldim. Ölkə xaricinə çıxa bilməməyim zədə ilə bağlıdı. Çapraz bağlarımda qismən qopma oldu və təklifləri dəyərləndirə bilmədim. Ötən mövsüm statistika baxımından mənim üçün kasad alınsa da, komanda üçün çox iş görürdüm.

- Sirr deyilsə, hansı ölkələrdən təkliflər gəlmişdi?
- Rəsmi təklif olmamışdı. Amma ciddi maraq var idi. Moldova, Belarus və Latviya klubları idi.

- Bazar günü dünya çempionatı başlayır. Hansı yığmaya azarkeşlik edirsən və kim daha şanslıdı?
- Portuqaliyaya azarkeşlik edirəm, favoritim isə Braziliyadı.

- Son vaxtlar əsas yığmada müəyyən inkişaf görünür. Nə vaxtsa bu komandada çıxış etməyi və mundiala vəsiqə qazanacağımızı düşünürsən?
- Əlbəttə, hər bir futbolçu milli komandanın formasını geymək istəyər. Bu, mənim üçün fəxr olar. Son 4 oyuna baxsaq, komandada yüksəliş var, qələbələr özgüvəni artırır və bu yaxşı haldı. Lakin buna aldanmaq olmaz. Daha yaxşı nəticələr qazanmaq üçün çox çalışmalı, inkişaf etməliyik. Millini dünya çempionatında görmək mənim üçün həm maraqlı, həm də böyük qürur olardı.

ABDULLA İSMAYILOĞLU