Dünən "Qarabağ"ın Konfrans Liqasının pley-off mərhələsindəki rəqibi bəlli oldu.

Qurban Qurbanovun çalışdırdığı komanda Belçika “Gent”i ilə üz-üzə gələcək. "Köhlən atlar" ilk matçını fevralın 16-da evdə, cavab qarşılaşmasını isə 23-də səfərdə keçirəcək.

“Football-plus.az” olaraq ağdamlıların rəqibini yaxından tanıtmaq istəyirik.

Eyniadlı şəhəri təmsil edən klub 1989/90 mövsümündən yüksək dəstədə çıxış edir. Ləqəbi “buğalar” olan komnanda tarixi ərzində 3 dəfə - 1963/64, 1983/84 və 2009/19 “futbol ili”ndə Belçika kubokunun qalibi olub. Ev oyunlarını 20000 azarkeş tutumuna malik “Qelamko Arena”da keçirir. “Gent” 2021/22 mövsümündə Belçika çempionatında 5-ci yeri tutaraq avrokuboklara vəsiqə qazanıb. Hazırda UEFA reytinqində 38-ci pillədə qərarlaşıb. Klubun prezidenti İvan de Vitte, baş məşqçisi isə Heyn Vanxazebrukdu.

“Qarabağ”ın pley-offdakı rəqibinin heyətində 14 legioner çıxış edir. Ümumiyyətlə isə kollektivin 9 üzvü fərqli yığmaların şərəfini qoruyur. Məşhur “transfermarkt” portalında “buğalar”ın ən bahalı futbolçusu kimi hazırda zədəli olan 29 yaşlı mərakeşli Tarik Tissodali göstərilib. Son vaxtlar yaşıl meydanlardan kənarda qalan mərkəz hücumçusunun transfer dəyəri 7,5 milyon avrodu. “Gent”in ikinci bahalı oyunçusu keniyalı Cozef Okumudu. 25 yaşlı mərkəz müdafiəçisinin transfer dəyəri 6 milyon avro qiymətləndirilir. Tarik zədə səbəbindən cari mövsümdə cəmi 2 oyunda meydanda olubsa, Okumu “Gent”in vazkeçilməzlərindən biridi. Keniyalı 13 qarşılaşmada komandasına kömək edib. “Buğalar”ın bu gün üçün “vuran ayağı” Uqo Keypersdi. Belçikalı forvard 15 oyuna rəqib qapılarından 9 qol keçirib, hesabında 1 məhsuldar ötürmə var. “Gent” onu rənglərinə bağlamaq üçün bu ilin yayında “Mexelen”ə 4 milyon avro ödəyib. Mərkəz yarımmüdafiəçisi mövqeyində çıxış edən Hyun-seok Honqun hesabında isə 4 qol var. Cənubi koreyalı qollardan başqa 13 matçda 3 məhsuldar ötürmə ilə yadda qalıb.

“Gent”in baş məşqçisi, yuxarıda qeyd etdiyimiz kimi, belçikalı Heyn Vanxazebrukdu. 58 yaşlı mütəxəssis 2020-ci ildən “buğalar”ın “sükanı arxasındadı” və müqaviləsinin müddəti 2024-cü ilin yayına kimi nəzərdə tutulub. Vanxazebrukun çalışdırdığı komanda daha çox 3-4-1-2 düzülüşü ilə meydana çıxır. Baş məşqçi karyerası ərzində “Anderlext”, “Kortreyk”, “Lokeren” klublarında çalışıb.

“Buğalar” hazırda Belçika çempionatında 16 turdan sonra 6-cı pillədə qərarlaşıb. Komanda evdə keçirdiyi 8 matçda 5 qələbə qazanıbsa, 1 oyun heç-heçə başa çatıb, 2 görüşdə isə meydanı məyus tərk edib. Səfərdə eyni sayda oyun keçirən “buğalar”ın hesabında 3 qələbə, 2 heç-heçə və 3 məğlubiyyət var. Noyabrın 9-da isə Vanxazebrukun yetiurmələrini Belçika kubokunun 1/8 finalında “Dessel Sport”la oyun gözləyir.

“Köhlən atlar”ın fevralda üz-üzə gələcəyi rəqibi Konfrans Liqasında Norveç “Molde”si, İsveç “Yurqorden”i və İrlandiya “Şemrok Rovers”i ilə F qrupunda yer alıb. Və qrup ikincisi kimi pley-offa vəsiqə qazanıb.

Sonda onu da qeyd edək ki, “Gent”in büdcəsi 68,2 milyon avrodu.

RƏŞAD