Santyaqo Sançes 9 ay bundan öncə qarşısına qeyri-adi bir məqsəd qoymuşdu.

İspaniya vətəndaşı və ''Real'' azarkeşi olan bu şəxs evindən çıxaraq Qətərdəki mundiala yollanmaq qərarına gəldi. Amma o, bu arzusuna heç bir nəqliyyat vasitəsinə minmədən, yəni ayaqla yollanaraq çatmaq niyyətində idi. Sançes bu cür şəkildə düz 15 ölkədən keçərək təxminən 3 həftə əvvəl İrana çatmışdı. Hər ölkədən paylaşımlar edən Sançesi təqibçiləri sosial şəbəkələrdə böyük maraqla izləyirdilər. Ancaq İran sərhəddini keçdikdən və dağda gecələməyi planlaşdırdığını açıqladıqdan sonra ondan heç bir xəbər-ətər yoxdu. Bu, onun sonuncu paylaşımı oldu. Həmin ərazidə yaşayan fermerin sözünə görə o, Sançesə bir gün öz evində gecələməyə şərait yaradaraq onu lazım olan şeylərlə təmin etdi. Amma həmin gecədən sonra yaxınları və ailə üzvləri Sançesi tapa bilmir. Məsələyə İspaniyanın Tehrandakı səfiri də qoşulub. Amma onun göstərdiyi kömək hələ ki, futbolsevəri tapmaq üçün yetərli olmayıb. Xatırladaq ki, İranda artıq neçə müddətdi dövlət əleyhinə etiraz aksiyaları keçirilir.