''Türkiyə yığmasını yerli məşqçi çalışdırmalıdı" - AÇIQLAMA
Millətlər Liqasında öz qrupunu lider tamamlamasına və B Liqasına yüksəlməsinə baxmayaraq Türkiyə yığmasında ab-hava heç də yaxşı deyil.
Football-plus.az xəbər verir ki, ''Ay-ulduzlular''ın Lüksemburq və Farer adaları kimi özündən səviyyəcə zəif olan yığmalara qarşı keçirdiyi son 2 qarşılaşmada cəmi 1 xal toplaması və 5 qol buraxması baş məşqçi məsələsini yenidən aktuallaşdırıb. Türkiyə futbol ictimaiyyəti tərəfindən sərt tənqid atəşinə tutulan Ştefan Kuntsun gələcəyi böyük sual altındadı. Bu arada vaxtilə Kunts ilə birlikdə ''Beşiktaş''da forma geyən, hazırda isə ''Sivasspor''u çalışdıran Rza Çalımbay da məsələyə münasibət bildirib. Təcrübəli mütəxəssis yığmanın başında yerli məşqçi görmək istədiyini deyib:
''Kuntsla yaxşı münasibətlərim var. Yaxından tanıdığım və sevdiyim bir futbol adamıdı. Yığmanın başına keçən kimi də zəng vurub onu təbrik etmişdim. Amma Türkiyə yığmasını çalışdırmaq fərqli bir durumdu. Bu, mən də daxil olmaqla hər bir yerli mütəxəssisin böyük məmnuniyyətlə işləmək istədiyi bir yerdi. Mən yığmada yerli məşqçilərin daha uğurlu olduğuna inananlardanam. Komandamız tarixindəki bütün əsas uğurlarını yerli məşqçilərə əldə edib. Ona görə də yığmanı türk məşqçi çalışdırmalıdı. Yanlış anlaşılmasın. Əcnəbi məşqçilərə qarşı deyiləm. Onlar gəlib istədikləri qədər klublarımızda çalışa bilərlər. Amma söhbət yığmadan gedirsə, yerli məşqçinin işləməsinin tərəfdarıyam. Çünki mən özüm yığmada bütün yaş kateqoriyalarında oynamışam. Oyunçuların psixologiyasını bilirəm. Bayrağı və formanı görən kimi daha da həvəslənirlər. Yerli məşqçilər isə oyunçulara bir qədər də milli ruh aşılayır''.
