“İticket” azarkeşlərin iradını qəbul etmədi
"Qarabağ"ın Bakıda "Nant"a qarşı keçirəcəyi Avropa Liqasının qrup mərhələsinin 2-ci turunun oyunu üçün biletlər satışa çıxarılıb.
Qiymət müvafiq olaraq 5, 20, 30, 75 və 100 manatdı. Biletləri matçın keçiriləcəyi Tofiq Bəhramov adına Respublika stadionunun kassalarından, "İticket.az"dan, Ağdam klubunun “Park Bulvar”dakı fan-şopundan, “28 Mall” və “Gənclik Mall” ticarət mərkəzlərindəki satış məntəqələrindən almaq olar. Bir şəxsiyyət vəsiqəsi ilə 3 bilet əldə etmək mümkündü.
Bu məlumatı klubun rəsmi saytı yayıb. Bazar günü isə biletlər deyilən saatda satışa çıxarılmadı. “İticket.az” saytında problem aşkarlandı. Portaldan bilet almaq mümkün deyildi. İstifadəçilər sosial şəbəkə hesablarında həm klubu, həm də saytı “yıxıb-sürüdü”. Amma məsələ ilə bağlı müraciət etdiyimiz şirkətin direktoru Kamran Abasov iradları qəbul etmədi:
“Sayt olaraq bazar günü saat 12.00-dan satışa başladıq. Düzdü, kassalarda 11.00-dan bilet var idi. Amma bizim saytımızda hansısa problem olmayıb. Həmin şikayətçilərin etirazlarının səbəbini bilmirəm. Düzdü, bəziləri iddia edir ki, pulumuz çıxır, amma bilet verilmir. Bu hallar mümkündü. Bəzi hallarda gecikmələr olur. Həmin istifadəçilərin müştərisi olduğu banklar bizə problem yaradır. Biz geri ödəmələr etmişik. Amma həmin bank və ya banklar pulları geri qaytarmır. Sizdən xahiş edirik ki, belə hallarla üzləşən müştərilər bizə müraciət etsinlər. Biz bu problemi şirkət olaraq həll edəcəyik. Yenə deyirəm, biletin alınmasında hansısa problem yoxdu. İndi həm kassalarda, həm də saytımızda yetərincə bilet var. Dünən klubdan icazə alaraq açıqlama yaydıq ki, 10 min bilet satılıb. Bu gün yenə proses davam edir. İstənilən vətəndaş bilet almaq üçün saytımıza daxil ola bilər. Ötən dəfə girişə görə problem yaşamışdıq. Amma hazırda eyni hal yaşanmayıb. Hətta sosial şəbəkələrdə yazılan postların rəylərində bir çox istifadəçilər çox rahat şəkildə bilet aldıqlarını qeyd ediblər. Bəziləri heç saytımıza daxil olmadan status yazır ki, “İticket.az” işləmir. Amma hamı yoxlaya bilər. Elə indi daxil olub, öz biletlərini əldə edə bilərlər”.
İLKİN SULTANLI
Digər xəbərlər
