"Əvvəla onu deyim ki, "İmarət" heç kimdən, heç bir təşkilatdan, o cümlədən "Qarabağ" klubundan və Qurban Qurbanovdan asılı olmayan, tam müstəqil qrupdu. Bəzi fanklublardan fərqli bu vaxta kimi heç kimdən nə qrant almışıq, nə də sifarişli fəaliyyət göstərmişik. Ona görə də "Qarabağ" - "Şamaxı" matçı zamanı hansısa "jurnalist"in durub azarkeşlərdən Qurban hocaya şikayət etməsi həm absurd, həm özünə jurnalist deyən şəxsin bisavadlığıdı. Dünya futbolunda elə bir qanun yoxdu ki, azarkeşlər kimdənsə asılı olsun. Azarkeş tam müstəqildi və heç kimin qarşısında öhdəliyik daşımır. Biz də "İmarət"i yaradanda bu prinsipi əsas tutduq. Necə ki, Qurban Qurbanov sıfırdan başlayaraq Avropa səviyyəli "Qarabağ" formalaşdırdı. Biz də komandamızı sevdiyimizdən "İmarət"i yaratdıq. "Fuck media" ifadəsinə gəlincə, bu yalnız söyüş, təhqir yox, həm də etiraz, narazılıq anlamında da işlənir və “lənət şeytana”, “zəhrimara qalsın”, “zibilə qalsın” mənasını da verir. Bizim azarkeş qrupunun məqsədi heç vaxt söyüş-təhqir olmayıb. Hərçənd hislərini boğa bilməyən azarkeşlərimiz arasında bunu söyüş kimi dilə gətirənlər varsa, onları da başa düşmək lazımdı. Komandamızın və Azərbaycan millisinin "1 nömrə”sinə ağızlarına gələnləri yazan "jurnalistlər”in qarşısında sakit dayanmalıydıq?! Bəli, Şahruddin Plzen təmsilçisiylə matçda zəif çıxış etdi, səhvlərə yol verdi. Bunu biz də qəbul edir, tənqid edirik. Hər kəs də həddi aşmadan tənqid edə bilər. Jurnalist isə daha elmli, irasional qaydada elə tənqiq etməlidi ki, sıravi vətəndaşdan, azarkeşdən üstünlüyü bilinsin və futbolçu daxil hamı bundan dərs çıxarsın. Yoxsa özünə jurnalist deyən bəziləri durub Şahruddini xalq düşməni kimi təqdim edir, onu bir əşya kimi kəsib atmağa çağırırlar. Məgər jurnalistlik, tənqid budu? Biz "İmarət" olaraq səhvi və doğrularıyla hər bir futbolçumuzu yanındayıq. Ona görə də hansısa "jurnalist" tərəfindən Şahruddin başda olmaqla heç bir futbolçumuzun aşağılanmasına yol verməyəcəyik. Tənqidlə təhqiri, qınaqla aşağılamanın fərqini, azarkeş qrupunun azad bir birlik olduğunu bilməyən və durub buna görə Qurban Qurbanovdan açıqlama tələb edən "jurnalistlər" gedib öz bisavadlıqlarını aradan qaldırsalar, yaxşı olar"