Çempionlar Liqasında III təsnifat mərhələsinə yekun vurulub.

"Qarabağ" səfərdə "Ferensvaroş"u məğlub edib - 3:1. Matçdan sonra komandamızın baş məşqçisi Qurban Qurbanovun mətbuat konfransı keçirilib. Mütəxəssis matç barədə fikirlərini bölüşüb:

- Avropa Liqasının qrupunu artıq təmin etdiniz. Minimum hədəfə çatdınızmı?
- Dəfələrlə demişəm ki, daha da irəli getmək üçün nə qədər şansımız varsa, bundan maksimum yararlanmalıyıq. Rahat olsaq və desək ki, eybi yox, Avropa Liqasının qrupunu artıq təmin etmişik, onda məğlub olarıq. Hər il belə qalibiyyətlər əldə etmək olmur. Qrupa düşmək şansımız varsa, bundan maksimum yararlanmağa çalışacağıq.

- Bakıdakı matçda böyük ajiotaj var idi. Növbəti ev matçının Bakı Olimpiya Stadionunda keçirilmə ehtimalı varmı?
- Bütün oyunlarımızı Tofiq Bəhramov adına Respublika Stadionunda keçirmişik. Bəlkə indiki məqamda stadion dəyişmək düzgün olmaz. Amma yenə də bunu Bakıya çatandan sonra müzakirə etmək olar.

- Belə düşünmək olar ki, taktiki baxımdan rəqibin baş məşqçisi Stanislav Çerçesovu üstələdiniz?
- Rəqibin baş məşqçisinə böyük hörmətim var. Bacarıqlı və böyük potensialı olan məşqçidi. Onun futbolçu və məşqçi karyerası məndən üstündü. Bu gün deyə bilmərəm ki, Çerçesova taktiki baxımdan qalib gəldik. İdman elədi ki, eyni komanda həmişə qalib gəlmir. Futbolçularım bu gün qələbəyə layiq idilər. Çünki çox istəyirdilər. Sabah istənilən təcrübəsi aşağı olan məşqçi mənə də qalib gələ bilər. Bu üzdən belə düşünmürəm. Çerçesov çox yaxşı komanda formalaşdırıb, yaxşı sistemləri var. Bu cür ifadə işlətməyim doğru olmaz.

- Kadi Borqesi matçın ən yaxşısı saymaq olar?
- Hər bir futbolçunun sağlam olması məşqçi üçün üstünlükdü. Bəzi lider futbolçular var. Hər bir futbolçunun üzərinə düşən tapşırıq var. Kadi də bu gün çox yaxşı çıxış etdi. Mənim üçün hamı Şahruddindi, Ramildi, Zubirdi. Heç kimi ayırmaq istəmirəm.