“Leykers”in forvardı Lebron Ceyms klubla müqavilə müddətinin uzadılmasını müzakirə edib.

Bu haqda xəbəri basketbolçunun agenti Riç Pola istinadla ESPN yayıb. Bu qaynağa inansaq, tərəflər çox məhsuldar dialoq aparıb, ancaq yeni müqavilə hələ razılaşdırılmayıb. Görüş avqustun 4-də baş tutub. Məhz həmin gün 37 yaşlı forvard 97,1 milyon dollarlıq ikiillik müqavilə bağlaya bilərdi. Forvardın başqa opsiyadan yararlanmaq və yalnız biriillik – 47 milyon dollarlıq müqavilə bağlamaq hüququ da var.

Bu arada “Leykers”in digər forvardı Entoni Devis Kentukki ştatındakı nəhəng subasmadan əziyyət çəkənlərə yardım fonduna 350 min dollar ianə edib. Ötən həftənin ortalarında güclü yağışlar üzündən bu ştatda son 10 ildə ən böyük subasması başlayıb. 30-dan artıq adam həlak olub, onlarla adam itkin düşüb. Devis karyerasının əvvəlində Kentukki Universitetinin komandasında oynayıb və NCAA çempionu olmağa yardım edib.

MBA ilə bağlı başqa maraqlı xəbər də var. “Oklahoma” və “Mayami” forvardlar Aleksey Pokuşevski ilə Nikola Yoviçi Avropa çempionatının final mərhələsinə hazırlaşan Serbiya yığmasının düşərgəsinə buraxmayıb. Yığmanın çərçənbə günü açıqlanan genişləndirilmiş heyətində bu iki basketbolçunun da adı var. Yığmanın baş məşqçisi Svetislav Peşiçin dedikləri: “Pokuşevski ilə Yoviçə gəlincə, onların komandaları icazə verməyib. Bu klublar istəyirlər ki, oyunçular düşərgədə qalsınlar və yeni mövsümə hazırlaşsınlar”.

Serbiya yığması Avrobasketin qrup mərhələsində Niderland, Finlandiya, Polşa, İsrail və Çexiya ilə birgə mübarizə aparacaq.