"Sabah"ın üzə çıxardığı perspektivli gənclərdən biri də Şakir Seyidovdu.

Ötən mövsümü icarə əsasında Latviya "Dauqavpils"ində keçirən 21 yaşlı müdafiəçi növbəti mövsüm icarə əsasında "Turan Tovuz"da oynayacaq. Dünən onunla əlaqə saxlayıb bu və başqa mövzularla bağlı söhbətləşdik.

- Peşəkar karyerana "Sabah"da başladın. Bu klub sənə nələr qazandırdı?

- 2017-ci ildən "Sabah"ın üzvüyəm. Bu komandada bir çox ilklərə imza atmışam. Premyer-liqada debütüm, ilk qolum... Futbolçu kimi inkişafımda, təcrübə toplamağımda "Sabah"ın danılmaz rolu var. Ona görə "Sabah" mənim üçün tək klub yox, həm də doğma məkandı.

- Ötən mövsümü icarə əsasında "Dauqavpils"də keçirməklə ilk dəfə legioner həyatı yaşadın. Bu haqda nə deyə bilərsən?

- 2021/22 mövsümünə pis başlamadım. Sonrakı oyunlarda zədələnərək bir müddət kənarda qaldım. Formamı bərpa etmək üçün Latviyada oynamaq təklif olundu və bunu dəyərləndirdim. "Dauqavpils"də 9 oyuna çıxdım, 3 məhsuldar ötürmə ilə yadda qaldım. Düşünürəm ki, pis çıxış etmədim, ən əsası, formamı bərpa etdim.

- Latviyada davam etmək olmazdı?

- Əlbəttə, olardı, təklif də gəlmişdi. Sadəcə, Azərbaycana qayıdıb bir az da inkişaf etməyi üstün tutdum. Açığı, bizim premyer-liqa Latviya çempionatından güclüdü. Bizdə sürətli, texnikalı oyunlara tez-tez rast gəlmək olar. Latviyada isə belə deyil.

- "Dauqavpils"də "Neftçi"nin yetirməsi Asim Əlizadə də çıxış edir. Onun oyununu necə qiymətləndirərdin?

- Asimlə birlikdə oynamaq mənə çox rahat idi. Həm dil problemimiz yox idi, həm də U-21 millimizdə birgə çıxış etdiyimizdən, qarşılıqlı koordinasiyamız yaxşı alınırdı. Asim meydanda əzmkarlığı ilə seçilən və qarşısına qoyduğu məqsədlərə doğru addımlayan xarakterli futbolçudu. Futboldan kənarda da yaxşı yoldaşdı.

- Uzun illərdi Latviyada çıxış edən millimizin sabiq üzvü Vüqar Əsgərovla münasibətiniz vardı. Təcrübəli futbolçu sizinlə görüşüb təcrübəsini bölüşüb?

- Əlbəttə, görüşmüşük. Ondan yalnız təcrübəli futbolçu yox, böyük qardaş kimi də çox şey öyrənmişəm. Sağ olsun, həm mənim, həm də Asim Əlizadə üçün əlindən gələn köməyi əsirgəməyib.

- Latviyada yaşayış yeriniz və yerli camaatın sizə münasibəti necə idi?

- Klub Asimlə mənə ayrıca ev tutmuşdu, orda qalırdıq. Komandada heç kim bizi özlərindən ayrı saymırdı. Latviya xalqı da mehriban, qonaqpərvərdi. Latviyadakı 6 aylıq karyeramda ancaq xoş anlar yaşadım.

- Niyə "Turan Tovuz"u seçdin?

- Başqa seçimlər də vardı. Amma mən bölgə təmsilçisini seçdim. Bunun bir neçə səbəbi var. Əvvəla ona görə ki, Tovuz şəhəri ölkə futboluna həmişə rəng qatıb. Tovuzluların Azərbaycanda ən çılğın və komandalarını sona qədər dəstəkləmək xüsusiyyətləri var. Ən əsası, Ayxan Abbasov kimi məşqçinin rəhbərliyi altında çıxış etmək ayrıca motivasiya, təcrübə, inkişaf deməkdi.

- Ayxan Abbasovun məşqçi kimi üstünlüyü nədədi?

- Ayxan müəllim gənc, prinsipial və məşqçi kimi özünü doğruldan mütəxəssislərdəndi. Onun yetərincə uğurları var. Hansı komandaya rəhbərlik edibsə, orda döyüşkən, mübariz, həmçinin mehriban kollektiv formalaşdırıb. "Zirə" və "Sumqayıt"ı avrokuboklara daşıyıb. Düşünürəm ki, "Turan Tovuz"u da uğurlara daşıyacaq.

- Sonuncu dəfə gənc futbolçulardan Nurlan Novruzov ölkə çempionatında bombardir olub. "Turan Tovuz"un heyətində bombardir olmağı düşünürsən?

- Qarşıma belə bir məqsəd qoymamışam. Komandaya oyun planında faydalı olmağa köklənmişəm. Kollektiv oyunla daha yaxşı nəticələr əldə edəcəyimizi düşünürəm. "Turan Tovuz"u uğura daşımaq üçün bütün gücümü, bacarığımı ortaya qoyacam.

ABDULLA İSMAYILOĞLU