Dünən Konfrans Liqasında 2-ci təsnifat mərhələsinin püşkü atılıb.

Mərasimdə “Qəbələ”nin də rəqibinin adına aydınlıq gəlib.

“Qırmızı-qaralar” Macarıstan “Fehervar"ı ilə üz-üzə gələcək. Konfrans Liqasının 2-ci təsnifat mərhələsinin oyunları 21 - 28 iyulda keçiriləcək.

“Fehervar”ın tarixi ilə bağlı qısa tanıtım yazısı hazırladıq.

Əvvəlcə onu qeyd edək ki, komanda indiyə kimi avrokuboklarda Azərbaycan klubları ilə qarşılaşmayıb. “Qəbələ” kimi “Fehervar”da Macarıstan çempionatını 4-cü yerdə başa vurub.

Kifayət qədər zəngin tarixə malik klubun əsası 1941-ci ildə qoyulub. Bir neçə ad dəyişikliyindən sonra komanda 1968-ci il mövsümündə ilk dəfə birinci divizionda iştirak etsə də, bu, uğursuz olub.

Onların ilk uğurları 1975/76 mövsümündə 2-ci pillədə qərarlaşan zaman olib. 2010/11-də isə ilk ölkə çempionu olmağı bacarıblar. Daha sonra 2015 və 2018-ci illərdə yenidən bu nəticəni əldə edərək uğurlarını təkrarladılar.

Komandanın beynəlxal səviyyədə də böyük uğurları da var. Belə ki,1985-ci ildə UEFA Kubokunun finalında çıxış edən “Fehervar” “Real Madrid”ə 0-3 hesabı ilə məğlub olub.

Həmin mövsüm komanda 2-ci mərhələdə PSJ-ni, 1/4 finalda isə “Mançester Yunayted”i mübarizədən kənarlaşdırmışdı. 2000-ci ildən bəri üç dəfə Macarıstan çempionu olmasına baxmayaraq, Çempionlar Liqasında ciddi uğur qazana bilməyib. Macarıstan təmsilçisi bu illər ərzində ən nüfuzlu klub turnirinin qrup mərhələsinə vəsiqə qazanmağı bacarmayıb.

Buna baxmayaraq, 2012/13 və 2018/19 mövsümündə Avropa Liqasının qrup mərhələsinə yüksəliblər. Amma, heç birində pley-off mərhələsinə vəsiqə qazanmaq mümkün olmayıb.

Komandanın baş məşqçisi almaniyalı Mixail Borisdi. 2021-ci ildən kluba gələn mütəxəssis Almaniyanın “Şalke-04”ün ikinci komandasında da çalışıb.

Klub oyunlarını Sekeşfexervar şəhərində yerləşən “Sostoi” stadionunda keçirir. 2018-ci ildə əsaslı təmir edildikdən sonra arenanın tutumu 14300-ə çatdırılıb.

ŞAİR ABDULLA