Azərbaycan futbolunda 2021/22 mövsümü başa çatdı.

Artıq klublar fasiləyə yollanıb. Lisenziyalaşdırma Komissiyası 1-ci divizionda çıxış edən “Kəpəz”lə “Turan Tovuz”a xoşbəxtlik bəxş etmişdi. Onlara lisenziya verilmişdi. Sadəcə, İcraiyyə Komitəsinin təsdiqi gözlənilirdi. Mayın 31-də, saat 17.00-da, “Dalğa Arena”nın ərazisində yerləşən Milli Komandaların Məşq Mərkəzində qurumun iclası keçirildi. Gəlin, əvvəlcə qərarlarla tanış olaq:

1. AFFA-nın Yoxlama və Təftiş Komitəsinin Əsasnaməsi təsdiq olunsun. Komitənin sədri vəzifəsi müvəqqəti olaraq 3 ay müddətinə Xalid Cavadova həvalə olunsun. Bu müddət başa çatandan sonra tərəflərin qarşılıqlı razılığı əsasında müqavilə 2024-cü ilin martına qədər uzadılsın.

2. Azərbaycan premyer-liqasının 2022/23 mövsümü 10 komandanın iştirakı ilə keçirilsin. Müvafiq lisenziya alan “Kəpəz” və “Turan Tovuz” klublarının çempionatda iştirakı təsdiqlənsin.

3. 2022/23 mövsümündə Azərbaycan premyer-liqasında legioner limiti 7+4 (7 əcnəbi, 4 yerli futbolçu) sistemi ilə tətbiq olunsun.

4. Beynəlxalq təcrübə, UEFA-nın milli komandalar və klub yarışlarında tətbiq olunan qaydalar nəzərə alınaraq, Azərbaycan premyer-liqasında 2022/23 mövsümündən etibarən oyunlarda 5 əvəzetməyə icazə verilsin. Meydanı tərk edən futbolçuların əvəzinə oyuna daxil olan minimum 2 oyunçu yerli statuslu futbolçu olmalıdı.

5. Naib Əsədov AFFA-nın İntizam Komitəsinə üzv təyin olunsun.

6. Müvafiq komissiyanın təqdimatına uyğun olaraq, adları aşağıda göstərilmiş futbol veteranlarına AFFA-nın təqaüdü verilsin:

- Məlik Həsənov
- Xanoğlan Abbasov
- Əli Hüseynov
- Boris Tibilov

İclasın sonunda İcraiyyə Komitəsinin üzvü, “Şamaxı”nın Müşahidə Şurasının sədri Zaur Axundov işlərinin çoxluğu, Şamaxı şəhərinə gediş-gəliş üçün məsafə ilə bağlı vaxt məhdudiyyətini nəzərə alaraq klubda tutduğu vəzifədən istefa verdiyini bildirib. O, Azərbaycan Futzal Federasiyasının prezidenti vəzifəsində fəaliyyətini davam etdirəcəyini qeyd edib. İclas başa çatandan sonra AFFA-nın prezidenti Rövnəq Abdullayev, İcraiyyə Komitəsinin üzvləri və baş katib Sərxan Hacıyev milli komandanın məşqini izləyib.

Yuxarıda qeyd etdiyimiz kimi, aprelin 29-da İcraiyyə Komitəsinin iclası keçirilmişdi. Orda “ilk “11-lik”də 21 yaşadək yerli futbolçu oynadılmalıdı” qaydası ləğv olunmuşdu. 33 gündən sonra isə legioner imiti dəyişdirildi. Növbəti mövsüm klublar start heyətində 7 legioner, 4 yerli futbolçu oynada biləcək. Bu dəyişikliyin səbəbi bəllidi. Avrokuboklarda iştirak edən klubların baş məşqçiləri legioner limitinə qarşı çıxırdılar. Həm Samir Abasov, həm də Rəşad Sadıqov mətbuat konfranslarında legioner limitinin mənasız olduğunu dilə gətirirdilər. Komitə onların bu istəyini tam olmasa da, müəyyən qədər təmin etdi. Təbii ki, bu, klubların avrokuboklarda uğur qazanmasına hesablanan addımdı.

Keçək əvəzetmə məsələsinə. Ötən iclasdan sonra Qurban Qurbanov mətbuat konfranslarının birində belə bir fikir işlətmişdi:

Haqlı üsyan idi. Çünki əvəzetmə sayının dəyişdirilməsini mövsümün əvvəlində istəmişdi. Baş məşqçisi olduğu komanda Konfrans Liqasında 5 əvəzetmədən istifadə edirdi. Lakin çempionatda bunu 3 dəfə etməli idi. UEFA 5-li əvəzetmədən istifadə edirsə, nə üçün AFFA buna qarşı çıxmalı idi? Bəs nə baş verdi ki, qurum qərarını dəyişdi? Görünür, AFFA prezidenti Rövnəq Abdullayev Qurban Qurbanova “Şöhrət” ordeni təqdim edərkən bu məsələ ilə bağlı yenidən söhbət ediblər. Federasiya rəhbəri də ölkənin ən uğurlu məşqçisinin təklifini yenidən müzakirəyə çıxararaq qəbul edilməsinə şərait yaradıb.

Zaur Axundovun istefası təəccüblü deyil. “Keşlə” “Şamaxı” olanda bu gözlənilirdi. Bir müddət öncə “Futbol+”də bu haqda yazı da getmişdi ki, klubun adı “Şamaxı” olandan sonra rəhbərlik dəyişəcək. Bunun səbəbi var. Azərbaycan hakimiyyəti 2023-cü ildə "Türk dünyasının turizm paytaxtı" seçilən Şamaxının strateji əhəmiyyətini artırır. Şamaxı ölkə turizmində əhəmiyyətli mövqe tutacaq. Bu səbəbdən də şəhərin klubu da iddialı olmalıdı. Redaksiyamıza daxil olan məlumata görə, idarəçilik Azər Əliyevə tapşırılır. Ölkə başçısı İlham Əliyevin bacısı Sevil xanımın oğlu həm də Ağır Atletika Federasiyasının vitse-prezidentidi. Özü də idmançı olan Azər bəy klubun Müşahidə Şurasının rəhbəri olacaq. Lakin idarəçiliyi yenidən klub prezidenti edəcək. Hər iki təyinatın yaxın günlərdə açıqlanacağı gözlənilir.

Beləliklə, vacib qərarların səbəbini izah etdik. Həmçinin Cüdo Federasiyasının prezidenti vəzifəsindən ayrılandan sonra Rövnəq Abdullayev belə açıqlama vermişdi:

“Artıq futbolla normal məşğul olmağa başlayacam. Burda görüləsi çox işlər var”.

Görünür, AFFA prezidenti vədinə əməl edir. Elxan Məmmədovun da FIFA-da vəzifəyə keçməsindən sonra boş qalan quruma şəxsən özü nəzarət etməyə başlayıb. Bütün təklifləri dəyərləndirir, söz-söhbətə səbəb olan məsələləri yenidən müzakirəyə çıxarıb, qəbul olmasına çalışır.

İLKİN SULTANLI