“Şamaxı”nın İdarə Heyəti Rüstəm Əliyevin baş məşqçi vəzifəsinə təyin olunmasına qərar verib.

Bölgə təmsilçisinin mətbuat xidmətindən verilən məlumata görə, 35 yaşlı mütəxəssislə növbəti mövsümün sonuna qədər müqavilə bağlanıb. Əliyev Sənan Qurbanovun istefaya göndərilməsindən sonra, aprelin 16-dan komandaya rəhbərlik edir. “Şamaxı” iki futbolçusuyla da anlaşdığını açıqlayıb. Müdafiəçi Rəhman Daşdəmirov və moldovalı qapıçısı Stanislav Namaşko daha 1 il komandanın uğurları üçün çalışacaq.

Dünən Rüstəm Əliyevlə əlaqə saxlayıb, bu və başqa məsələlər ətrafında söhbətləşdik.

- Növbəti mövsümdə komandanın qarşısına hansı hədəflər qoyulub?
- "Şamaxı" "Keşlə"adı altında çıxış etdiyi vaxtlarda ölkə futbolunda uğurları ilə tarix yazıb. Komanda iki dəfə çempionatın, iki dəfə ölkə kubokunun, bir dəfə isə "Birlik kuboku"nun qalibi olub. Titullar qazanan komandanı yenidən iddialılar sırasına qaytarmaq istəyirik. Növbəti mövsümə təcrübəli yerli futbolçular, legionerlər və gənclərdən ibarət döyüşkən komanda ilə başlayacağıq. Hədəf çempionatda ilk “4-lüy”ə düşmək və kubokun qalibi olmaqdı.

- Komandanı tərk edən futbolçular çoxdu?
- Heyətin 60 faizi ilə yolları ayırdıq. "Qəbələ"yə keçən İlkin Qırtımovla yanaşı, Kamal Bayramov, Amil Yunanov, Tural Axundov, Tərlan Quliyev, legionerlərdən Natan Oduva və Aldair Neto ilə də vidalaşdıq. Xidmətində maraqlı olduğumuz futbolçularla isə danışıqlar davam edir.

- Stanislav Namaşkodan başqa hansı legioneri heyətdə saxlayacaqsız?
- Sadio Tounkara, Felipe Santos bizimlə davam edəcək. Franko Flores və Merab Qiqauri ilə danışıqlar davam edir. Qalan legionerləri yola saldıq.

- Bəs aparıcı oyunçularınızdan Rəhman Hacıyevin taleyi necə olacaq?
- Onunla da danışıq aparırıq. Rəhmanın komandada qalmasını çox istəyirəm.

- 35 yaşlı Namaşkonun əvəzinə yerli qapıçı ilə davam etmək olmazdı?
- Qapı xətti elə mövqedi ki, ora mütləq təcrübəli qolkiper cəlb olunmalıdı. Namaşko yetərincə təcrübəli, güclü qapıçıdı. Moldova millisinə də dəvət alır. Amma bu o demək deyil ki, yalnız onunla kifayətlənəcəyik. Gənc əlcək sahibi Əkbər Vəliyevə də şans verəcəyik. Hazırda daha bir yerli qapıçı ilə danışıq aparırıq. Adını indidən açıqlamaq istəmirəm. Bir neçə gündən sonra məsələyə aydınlıq gələcək.

- Anatole Abanqı yenidən komandaya qaytarmaq planda var?
- Xeyr, onun xidmətində maraqlı deyilik.

- Legioner axtarışını Azərbaycanda, yoxsa ölkə xaricində aparırsız?
- Ölkə xaricində. Qapı xəttindən başqa hər mövqeyə namizəd axtarırıq. Bir neçə futbolçunu yaxından izləyirik.

- Əsas komandadan fərqli "Şamaxı-2" daha yaxşı çıxış edərək 1-ci divizionda gümüş medal qazandı. Əvəzedicilərdən hansısa gənci heyətə cəlb edəcəksiz?
- Biz həmişə akademiyamızın yetişdirdiyi gənclərin inkişafında və daha çox oynamasında maraqlıyıq. Əvəzedicilərdən 4 futbolçunu əsas komandaya cəlb etmişik. Düşünürəm ki, özlərini yaxşı tərəfdən göstərəcəklər.

- Komanda birdəfəlik Bakıdan köçəcək, yoxsa məşqləri yenə Bakıda, ev oyunlarını Şamaxıda keçirəcəksiz?
- Bu haqda hələ konkret nəsə deyə bilmərəm. Düşünürəm ki, yaxın günlərdə məsələyə aydınlıq gələcək.

- AFFA İcraiyyə Komitəsi legioner limitini dəyişmədi, U-21 limitini ləğv etdi, 5 əvəzetməyə keçmədi. Qərarlara münasibətiniz?
- Legioner limitinin "6+5" formatında saxlanılmasını doğru sayıram. Meydana daha çox legioner buraxmaqla yerli futbolçuların inkişafına zərbə vurmuş olarıq. Odu ki, azərbaycanlı futbolçuların taleyini də düşünmək lazımdı. Gənc futbolçunu oynatmağa gəlincə, perspektivi, istedadı olanlar limitin olub-olmamasından asılı olmayaraq, şans qazanıb özünü meydanda sübut edəcək. Əvəzetmənin isə beşə qaldırılmasının tərəfdarıydım. Bundan futbolumuz xeyir görər. Amma yenə də İcraiyyə Komitəsinin qərarına hörmət etməliyik.

ABDULLA İSMAYILOĞLU