“Mançester Yunayted”in mövsümdəki son oyununu (“Kristal Pelas” – 0:1) izləyənlər arasında yeni baş məşqçi Erik ten Haq da var idi.

Niderlandlı mütəxəssisin təəccübü üzündən oxunurdu, sanki “gəlib hara düşmüşəm” deyirdi. Hər halda, yolun yarısından qayıtmaq olmaz. Hələ apreldə 52 yaşlı mütəxəssislə anlaşdığını elan edən MY mayın 23-də yeni baş məşqçisini ictimaiyyət önünə çıxardı. Ten Haq “Old Trafford”da fotosessiyaya qatıldı və mətbuat konfransı keçirdi. İndi oxuyacağınız müsahibəni isə klub telekanalının əməkdaşı Pien Myolenstenə verib.

- Özünüzü necə hiss edirsiz?
- Həyəcanlıyam. Böyük klub, böyük perspektivlər...

- Sizi hər şeydən çox nə narahat edir?
- Çox şey. Azarkeşləri qürurlanmağa məcbur etmək istəyirik. İndi çətin vəziyyətdəyik, ancaq vahid komanda qurmalıyıq. Elə komanda ki, həm nəticə qazansın, həm də hücum futbolu oynamaqla publikanı əyləndirsin.

- “Ayaks”da çempionluğu qazanandan dərhal sonra bura gəldiz. Niyə belə tez?
- İndi vaxtım var, adamlarla görüşmək, yeni mövsümə hazırlaşmaq, yeni mövsüm üçün komandanı, assistentləri və strategiyanı hazırlamaq istəyirəm.

- İnkişafla bağlı uzunmüddətli planlarınız çoxlarının xoşuna gəlir. Nəyisə bölüşə bilərsizmi?
- Klub əvvəlki mövsümdə 2-ci yeri tutub ki, bu da çox şeyin mümkün olduğunu göstərir. Sadəcə, öz fəlsəfəmizi yeritməliyik.

- Bəs qısamüddətli perspektivlər hansılardı?
- Hələ ki fasilədi (gülür). İyunun 27-dən sonra mövsümöncəsi hazırlığa başlayırıq. Əlbəttə, bəzi mövqelərdə bizə yeni oyunçular lazımdı, ancaq bu komanda ilə çalışmaq imkanını səbirsizliklə gözləyirəm.

- İndiki oyunçularla işləmək istərsizmi?
- Hə, əlbəttə. “Ayaks”da 4,5 il oldum, indi hər şeyə yenidən başlamaq lazımdı.

- Oyunçuların növbəti mövsüm də burda qalmağa layiq olduğunu göstərməsi onların özləri üçün nə dərəcədə vacibdi?
- Sözsüz, mən bunu gözləyirəm. İlk növbədə özümlə bağlı gözləntilərim çoxdu. Futbolçulara gəlincə… Mənim üçün “yaxşı” kifayət deyil, biz böyük hədəflərə can atmalıyıq.

- Bu qərarı qəbul etməmiş Edvin van der Sarla danışıbsızmı?
- Hə, əlbəttə. Edvin MY-yə getdiyimi dediyim adamlar sırasında birincilərdən idi. O hələ də “Mançester Yunayted”in əsas azarkeşidi. Biz “Ayaks”a qarşı oynamayanda həmişə məni dəstəkləyəcək.

- Klubumuz möhtəşəm tarixə malikdi. Bütün bunlarla yaxından tanış olmaq istəyirsizmi?
- Əlbəttə, “Yunayted”in tarixini bilirəm, komandanın yaxşı, elit, dünya futbolunda dominantlıq etdiyi dönəmləri bilirəm. Basbini, Çarltonu tanıyıram. MY Ferqyusona qədər də böyük klub idi. Komandanın son dəqiqəyə qədər mübarizə aparması məni hər şeydən çox valeh edir.

- “Yunayted”ə qarşı və ya “Old Trafford”da heç vaxt oynamamısız. Həyəcanlısız?
- Sözsüz. Burdakı atmosfer və fanatlar möhtəşəmdi.

- “Old Trafford”un tunelindən çıxarkən emosiyalarınız necə olacaq?
- Bilmirəm, bunu yaşamaq lazımdı. Ancaq buna əminəm ki, uğur qazanmaq üçün əlimdən gələni edəcəm.

- Premyer-liqada komanda çalışdırmağı həmişə istəmisiz?
- Mən xəyalpərəst deyiləm, indiki günlə yaşayıram. Özümü tamlıqla işə verirəm və məntiqli qərarlar qəbul edirəm. Bizə yaxşı konsepsiya və doğru adamlar lazımdı. Və gündəlik çətin iş. Belədə uğur gəlir və yeni imkanlar açılır.

- “Ayaks” haqda danışaq. Yaxınlarda bu komanda ilə ardıcıl üçüncü titulu qazandız. Bu nə dərəcədə vacib idi?
- Əsas olan budu, titullardı. 4,5 il əvvəl bu layihəyə başlayanda PSV ilə “Feyenoord” zirvədə idi. Ancaq hədəfimizin öhdəsindən gəldik və “Ayaks”ı zirvətə qaytardıq. Hədəflərimdən biri də Avropada ciddi tərəqqiyə nail olmaq idi. Çempionlar Liqasında yarımfinala çıxa bildik, yaxşı oyun göstərdik, düşünürəm ki, hər kəs bundan razı qaldı.

- “Ayaks”dakı ən böyük uğurunuz hansıdı?
- Çox güman, Çempionlar Liqasındakı çıxış və həmin yarımfinal.

- Sizin üçün hansısa bir ayrıca oyun varmı ki, baxasız və deyəsiz: “Mən də komandamın məhz belə oynamasını istəyirəm”?
- Əlbəttə, belə oyunlar var. Ancaq heç vaxt komandaları müqayisə etməyə dəyməz. Biz həmişə öz şərtlərimizi, üslubumuzu və oyunumuzu diqtə etməyə çalışmışıq. “Mançester Yunayted”lə də belə oynamaq istəyirəm. Ancaq enində-sonunda hər şey konkret şəxslərin bacarığından asılıdı. Futbolçular necə hərəkət etmək istədiklərini müəyyənləşdirməlidilər.

- Komandalar “Old Trafford”a gələrkən az qala həyatlarının ən vacib oyununu keçirirlər. “Ayaks”da da belə idi?
- Əlbəttə, həm “Bavariya”nın gənclərində, həm də “Ayaks”da belə olub. Biz buna hazır olmalıyıq. Həmişə rəqibdən daha artıq dərəcədə qələbəyə can atmalıyıq.

- Bir qədər dərindən baxsaq, “Yunayted”lə “Ayaks” arasında oxşarlıqlar çoxdu. Böyük tarix, öz yetirmələrinə bel bağlamaq, hücum futbolu – siz də bunu hiss edirsizmi?
- Bəli, əlbəttə. Və sizin rəqiblərin köklənməsi haqda dedikləriniz. “Arzuların teatrı”nda publikanı əyləndirməliyik. Yüksək pressinq tətbiq etməklə hücum üslubunda oynamağımız lazımdı. Bu oxşarlığı mən də görürəm. Təbii ki, “Ayaks” kimi, “Yunayted”in də akademiyanın istedadlarına güvənməklə bağlı böyük ənənəsi var.

- “Ayaks” və “Yunayted” öz ideyaları olan böyük klublardı. Öz fəlsəfənizi yeritmək nə dərəcədə vacib olacaq?
- Mənim yox, “Mançester Yunayted”in üslubunda oynamaq lazımdı! Hücum futbolu üslubunda! Elə struktur qurmalıyıq ki, bizə hücum futbolu oynamağa və rəqiblər üzərində dominantlıq etməyə imkan versin.

- “Ayaks”ını “döyüş maşını” kimi təsvir etmisiz. “Yunayted”də də bunu istəyirsizmi?
- Həmişə. Karyeram boyunca oyunçularıma münasibətdə sərt tələblərim olub. Son saniyəyə qədər döyüşməlidilər. Bir qədər əvvəl dediyim kimi, mənim üçün “yaxşı” kifayət deyil, biz rəqibdən üstün olmalıyıq.

ORXAN