"Kəpəz"in yeni mövsümdən premyer-liqada çıxış edəcəyi bəllidi.

Buna baxmayaraq, klub ətrafında qalmaqallar, söz-söhbət səngimək bilmir. Gəncəli azarkeşlər Yaşar Vahabzadənin istefasını tələb etsə də, yayılan söz-söhbətə görə, 62 yaşlı mütəxəssis postunu tərk etməyəcək və elitada “sarı-göylər”i çalışdıracaq. Bu və bizi maraqlandıran başqa suallara cavab tapmaq üçün Yaşar bəylə söhbətləşdik.

- Əvvəlcə başa çatan mövsümü dəyərləndirməyinizi istərdik.
- Birinci dövrədə komanda normal çıxış etdi, üst pillələrdə qərarlaşmışdıq. Ancaq ikinci dövrədə istədiyimiz alınmadı. Gözlənilməz xal itkiləri bizi aşağı yerlərə yuvarladı. Məşçqçilər korpusu ilə birgə uğursuz oyunları təhlil edib, harda səhv etdiyimizi araşdırmağa çalışırdıq. Bizə bəlli olan müəyyən səbəblər yaşandı ki, mövsümü mükafatçılar sırasında başa vurmağımıza imkan vermədi.

- Müəyyən səbəblər dedikdə nəyi nəzərdə tutursuz? Maliyyə problemi ilə üzləşdiz, futbolçular zəif oynadı, yoxsa kənar müdaxilələr komandanın uğurlu seriyanı davam etdirməsinə mane oldu?
- Açığı, ikinci dövrədə bəzi futbolçularımız bacarıqlarından aşağı oynadılar. Düzdü, son turlarda komanda toparlana bilmişdi. Ancaq ikinci dövrənin gedişində itrdiyimiz xallar sonda bizə baha başa gəldi. Cavid İmamverdiyevin zədələnməsi və demək olar, qışdan sonra meydana çıxmaması da özünü göstərdi. Cavid oynayanda hücumlarımız daha kəsərli alınırdı, təcrübəli oyunçu kimi kollektivi arxasınca apara bilirdi.

- Yayılan xəbərlərə görə, premyer-liqada da “Kəpəz”in “sükanı arxasında” siz olacaqsız...
- Bu suala hələ aydınlıq gəlməyib. Növbəti həftə iclas keçiriləcək. Həmin toplantıda baş məşqçi postunda qalıb-qalmayacağım bilinəcək. Son turdan sonra Bakıya gəlmişəm, hazırda istirahətdəyəm. Məsələhət bilsələr, Gəncədə qalıb işimi davam etdirəcəm.

- Fərz edək ki, rəhbərlik sizə etimad göstərdi. “Kəpəz” bu heyətlə elitada nəsə edə bilər?
- Birinci divizionla premyer-liqanı müqayisə etmək düzgün olmaz. Ora başqa, daha dəqiq desəm, üst səviyyədi. Bu səbəbdən komandanın güclənməyə ehtiyacı var və düşünürəm ki, məhz belə də olacaq.

- Belə çıxır, hazırkı heyətdə olan futbolçuların bəziləri ilə yolları ayıracaqsız?
- Bu, futbolun qanunudu. Komandadan ayrılan da olur, yeni cəlb olunan da. İşimi davam etdirməli olsam, perspektivli yerli gəncləri saxlamaq fikrim var. Əsas komanda ilə yanaşı, əvəzedicilər də olacaq. İkinci komanda gənclərin inkişafı baxımından bizə yardım edə bilər. Ümumiyyətlə, Gəncə klubu elitada çıxış edəcəyi halda, şəhərin gənc və yeniyetmələrinin başqa bölgələrə üz tutmasına ehtiyac qalmayacaq.

- Söylənilənlərə inansaq, premyer-liqada çıxış edəcəyinə baxmayaraq, “Kəpəz” əsasən gənclərdən formalaşacaq. Bu siyasətin özünü doğruldacağına inanırsız?
- Gənclərə güvənmək, onların inkişafına nail olmaq yaxşıdı. Ancaq heyəti tam cavanlardan formalaşdırmaq da yanlış addım olar. Onların yanında mütləq təcrübəli futbolçular yer almalıdı ki, nəsə öyrənə bilsinlər.

- Bəs legioner necə?
- Yenə deyirəm, qalıb-qalmayacağım hələ bilinmir. Qalsam, düşünürəm ki, komandaya əcnəbi futbolçu da dəvət olunmalıdı. Gənclərimiz təcrübəli futbolçularla yanaşı, legionerlərdən də nəsə öyrənə bilər.

- 2019-cu ildən “Kəpəz”in “sükanı arxasındasız”. Hər il də azarkeşlərlə aranızda narazılıq yaşanır. Daha doğrusu, gəncəlilər sizi istefaya səsləyir. Nə baş verir?
- Yaxşı olardı ki, bu sualı məni istefaya səsləyən azakeşlərə verəsiz. Bilmirəm, nə məsələdi. Hər il eyni vaxtda bir qrup azarkeş eyni addımı atır. Başa düşə bilmirəm, onlar nə istəyir? Özləri bunu edirlər, yoxsa başqa amillər var?

- Niyə onlarla görüşüb bu suala aydınlıq gətirmirsiz?
- Hamısı ilə olmasa da, bəzi fanklubların rəhbərləri ilə görüşüb söhbət etmişəm. Daha çox futbolçuların zəif oyunundan narazılıq edirlər. Onları narahat edən məsələ budu.

- Ancaq azarkeşlər futbolçulara yox, sizə etiraz edir, ünvanınıza “istefa” şüarları səsləndirirlər.
- Səbəbini bilmirəm. Bəli, uğursuz oyunlarımız oldu, mövsümü istədiyimiz yerdə bitirə bilmədik. Ancaq bunun səbəbi hamıya bəllidi. Özləri bunu bilə-bilə yenə günahı məndə görürlər (gülür).

RƏŞAD