Premyer-liqanın 7-ci pillədə başa vuran “Şamaxı” üçün mövsümün uğurlu keçdiyini söyləmək olmaz.

Bəlkə də bu üzdən bölgə təmsilçinin bəzi aparıcı üzvləri mövsümlərarası fasilədə düşərgəni tərk etməyə qərar veriblər. İlkin Qırtımovun artıq “Qəbələ” ilə ortaq məxrəcə gəldiyi məlumdusa, yaxın günlərdə daha bir neçə futbolçunun elitanın başqa klublarına üz tutacağı söylənilir. “Football-plus.az” saytının əldə etdiyi bilgiyə görə, “şirlər”in əsas simalarından olan Şəhriyar Əliyev də özünə yeni klub tapıb. Təcrübəli müdafiəçi “Səbail”lə danışıqları yekunlaşdırıb. O növbəti mövsümdən “dənizçilər”in uğuru üçün tər tökəcək.

“Ağ-qırmızılar”ın daha iki oyunçusu da Şəhriyarla İlkinin yolunu tutub. Söhbət Tərlan Quliyev və Tural Axundovdan gedir. Hər ikisi növbəti mövsüm premyer-liqada çıxış edəcək “Kəpəz”ə yollanacaqlar. Onların da artıq məsələsi həll olunub. Xatırladaq ki, həm Tərlan, həm də Tural karyeraları ərzində artıq bir dəfə Gəncə təmsilçisinin formasını geyiniblər. Tərlan 2015/16, Tural isə 2015-17-ci illər aralığında ölkənin ikincə şəhərinin komandasında çıxış ediblər.
Hələ ki, karyerasını “Şamaxı”da davam etdirəcəyi dəqiqləşən qapıçı Stanislav Namaşkodu. Moldova millisinin də “çərçivə qoruyucusu” rəhbərliklə söhbətdə müqaviləsini uzadacağı ilə bağlı razılığa gəlib.

RƏŞAD