Xəbər verdiyimiz kimi, mayın 2-də UEFA Rusiya klublarının avrokubokların 2022/23 mövsümündə iştirak edə bilməyəcəyini açıqlayıb.

Rusiya yığması da Millətlər Liqasından uzaqlaşdırılıb. UEFA-nın məlum qərarından sonra basketbol üzrə Avroliqanın son mövsümündə iştirak edən Rusiya klublarının da canına qorxu düşüb. Qonşu ölkənin media qurumları Avroliqaya sorğu ilə müraciət edərək, bu məsələyə aydınlıq gətirilməsini xahiş ediblər. Avroliqanın mətbuat xidmətinin cavabı: “Rusiya klublarının qarşıdakı mövsümdə iştirak edib-etməyəcəyi ilə bağlı hələ ki heç bir informasiya yoxdu. Qərar qəbul olunan kimi açıqlanacaq”.
Əslində rusların təlaşlanması üçün əsas var. Avroliqanın Səhmdarlar Şurası martın 22-də bu ölkənin klublarını – ÇSKA, “Zenit” və UNİKS-i mübarizədən kənarlaşdırmışdı.

Avroliqa ilə bağlı daha bir maraqlı xəbər var. Almaniyalı hakim Benjamin Bart saqqalını qırxmaqdan imtina etdiyinə görə oyunlara təyinat almadığını bildirib. Referi onu da əlavə edib ki, belə yanaşma diskriminasiyadı. Avroliqa da bu məsələ ilə bağlı bəyanat yayıb:

“Üzdə tüklə bağlı qeyri-rəsmi tələblər uzun illər ərzində müxtəlif idman növlərində adi praktika olub. Ancaq bu tələblər köhnəlib. Saqqal saxlamamaqla bağlı tövsiyə səhv idi və Avroliqanın 2022-nin aprelindəki üzrxahlığını alman referi qəbul edib”.

Bart ötən ilin payızından bəri Avroliqa oyunlarının idarəçiliyindən uzaq qalıb. Almaniya çempionatında 558 oyun idarə edən Bart Avroliqada da 20 il ərzində xidmətinə ən çox müraciət edilən hakimlərdən biri olub.