"Baş məşqçi təcili istefa ərizəsini AFFA rəhbərliyinə təqdim etməlidi" - Maşallah Əhmədov
“Son iki oyundan sonra bir söz deyə bilərəm: baş məşqçi təcili istefa ərizəsini AFFA rəhbərliyinə təqdim etməlidi. Yığmanı belə ağır, miskin durumdan ancaq yerli mütəxəssis çıxara bilər. Sizi əmin edirəm ki, komandanın “sükanı arxasında” azərbaycanlı məşqçilərdən kimsə olsa, nə Maltaya, nə də Latviyaya uduzarıq".
Bu sözləri "Futbol+" qəzetinə açıqlamasında Maşallah Əhmədov deyib. Tanınmış mütəxəssis yığmaya milli məşqçinin dəvət olunmalı olduğunu bildirir:
"Çoxları deyir ki, futbolçular klublarından fərqli yığmada istənilən səviyyədə çıxış etmir. Belə fikirləşənlərə klubla yığmanın fərqli olduğunu bildirməliyəm. Bir var hər gün eyni futbolçularla məşq edəsən, bir də var ildə 3-4 dəfə bir araya gələsən. Təbii ki, hər gün bir olduğun oyunçularla anlaşma daha yüksək olacaq. Yığmanı çalışdıran baş məşqçi elə addımlar atıb, elə sistem formalaşdırmalıdı ki, qısa müddət bir yerdə olan oyunçular meydanda yüksək performans nümayiş etdirsinlər. Millinin baş məşqçisi olmaq bu səbəbdən həm çətindi, həm də şərəflidi. Bir də yığma səviyyəsində beynəlxalq oyunlarla premyer-liqa və kubok qarşılaşmalarını tərəzinin eyni gözünə qoymaq düz deyil. Bizim çempionatda komandalar 9 ayda minimum 4, ölkə kubokunda da qarşılasalar, 6 dəfə üz-üzə gəlir. Yəni futolçular bir-birini o qədər yaxından tanıyırlar ki, kimin nəyə qadir olduğunu bilirlər. Beynəlxalq matçlarda isə rəqibi o qədər yaxşı təhlil etməlisən ki, oyunçu meydana çıxanda artıq qarşısındakının “qab”ında nə olduğunu bilməlidi. Bu da məşqçilər korpusundan asılıdı. Rəqibi təhlil etmək, onun zəif və güclü tərəflərini üzə çıxarmaq onların məsuliyyətindədi. Sonda bir daha “Canni de Byazi bu oyunlardan sonra istefa verməlidi” deyirəm. İyuna qədər vaxtımız var. Yerli məşqçi dəvət olunmalı və Millətlər Liqasına yığmanı o çıxarmalıdı. Əks halda iyundakı qarşılaşmalarda bizi daha böyük biabırçılıq gözləyir”.
