Vəkili Nurlan İbrahimovun cəzasının azadılmasını gözləyir - AÇIQLAMA
“Mənə elə gəlir ki, Rusiya ilə bağlı məsələlərə görə İAM-ın hüquqşünasları məşğuldu”
Vaxt keçir, zaman ötür, bayram bayramı əvəzləyir, amma “Qarabağ”ın mətbuat xidmətinin sabiq rəhbəri Nurlan İbrahimovun məsələsi hələ də həllini tapmır.
Son məlumata görə, martın 22-də yekun qərar açıqlanmalıydı. Amma bu gün axşam saatlarında Nurlanın vəkili Fərid Haqverdiyev şəxsi “feysbuk” səhifəsində bu məsələ ilə bağlı paylaşım etdi:
“Əziz dostlar, İAM-dan gələn məktubla Nurlan İbrahimov barədə qərarın açıqlanma tarixi mayın 25-nədək bir daha uzadıldı”.
Beləliklə, daha 2 ay bu məsələ həllini tapmayacaq. Görəsən, İAM nə üçün qərarı belə ləngidir? Suallarımızı Fərid Haqverdiyev cavabladı:
“Açığı, ötən dəfə olduğu kimi hansısa səbəb açıqlamadılar. Ənənəvi olaraq, müddətin uzadılması ilə bağlı məlumat verdilər. Bizə də bunun səbəbi anlaşılmaz qaldı. Mənə elə gəlir ki, Rusiya ilə bağlı məsələlərə görə İAM-ın hüquqşünasları məşğuldu. Ukraynadakı müharibəyə görə tətbiq olunan sanksiyaları müzakirə edirlər. Həm də belə görünür ki, qərar hələ tam hazır deyil. Ümid edirəm ki, maydan sonra uzadılma olmayacaq. Bundan sonra, nəhayət, qərarı ala biləcəyik”.
Fərid bəy vaxtın uzadılmasının Nurlan bəyin cəzasının bütövlüklə ləğv edilməsinə səbəb olmayacağını bildirdi:
“Yadınıza gəlirsə, oktyabrın 8-də bizi dinləmişdilər. Ondan sonrakı müddətdə qərar verməliydilər. Amma 6 aydı bu məsələ uzanır. Sözsüz, burda cəzanın tam ləğvini tələb etmirik. Amma düşünürəm ki, təqdim etdiyimiz sübutlar, gətirdiyimiz dəlillər əsasında cəza kifayət qədər azaldılmalıdı. Burda nəzəri baxımdan istənilən qərar çıxa bilər. Nəzərə alaq ki, qərardan 2 ilə yaxın vaxt keçib. Nurlan bu müddətdə futboldan aralı qalıb. O, artıq cəzasının 2 ilini çəkmiş sayılır. Bu səbəbdən də düşünürəm ki, qərar dəyişdirilməlidi. Gözləntimiz budu”.
İLKİN SULTANLI
