DÇ-2022-nin Braziliya - Argentina seçmə matçı ilə bağlı yeni xəbər yayılıb.

“O Globo” nəşri başıbəlalı oyunun Cənubi Amerikadan kənarda keçirilə biləcəyini iddia edir.

Əvvəlcə regionun 2021-ci il sentyabrın 5-nə təyin olunan bir nömrəli derbisinin ilk dəqiqələrdəcə dayandırıldığını xatırladaq. San Pauludakı matçın dayanmasına Braziliya Milli Sağlamlığı Müşahidə Agentliyinin (Anvisa) nümayəndələri ilə polislərin meydana daxil olması rəvac vermişdi. Onlar Argentina yığmasının bəzi oyunçularının koronavirusa qarşı mübarizə üzrə qaydalara riayət etmədiklərini əsas gətirərək belə addım atmalı olmuşdular. Polislər Argentina millisinin düşərgəsinə İngiltərədən qoşulan 4 futbolçunu - Emiliano Martines, Emiliano Buendiya (hər ikisi “Aston Villa”), Covani Lo Çelso və Kristian Romeronu (hər ikisi “Tottenhem”) Braziliyadan deportasiya etmək istəmişdilər. Həmin dövrdəki qaydalara əsasən İngiltərədən bu ölkəyə gələn şəxslər 14 günlük karantindən keçməli idilər. Lakin 4 argentinalı futbolçunun Braziliyanın immiqrasiya işçilərinə yalan məlumat verməsi ciddi şübhələr doğurmuşdu.

Onlar matça yaxın günlərdə İngiltərədə olmadıqlarını iddia etmişdilər. Halbuki Martines ilə Buendiya avqustun 28-də premyer-liqada “Aston Villa”nın “Brentford”la ev oyununda (1:1) iştirak etmişdilər, Buendiya hətta birmingemlilərin cavab qolunu vurmuşdu. Lo Çelso ilə Romero ertəsi gün “Tottenhem”in “Uotford”la oyununda meydana çıxmasalar da, hər ikisi ehtiyat oyunçular skamyasında görünmüşdü. Deməli, argentinalı futbolçuların Braziliyanın immiqrasiya xidmətinin əməkdaşlarını aldatdıqları dəqiq idi. Qalmaqalın daha bir maraqlı tərəfi odu ki, FİFA prinsipial oyunla bağlı hər iki tərəfə münasibətdə intizam işi açsa da, indiyədək cəzalanan olmayıb...

Nə isə, “O Globo”nun xəbərində Braziliya Futbol Konfederasiyasının (BFK) FİFA-ya matçın məkanının dəyişdirilməsi xahişi ilə müraciət etdiyi bildirilir. Bu mənbəyə inansaq, derbi Avstraliyada və ya Asiya ölkələrindən birində təşkil edilə bilər. Ali futbol təşkilatının BFK-nın müraciətini müsbət cavablaması gözlənilir. Belə ki, artıq əzəli rəqiblərin yarımçıq qalan oyununun seçmə turnirdə elə bir ciddi əhəmiyyəti qalmayıb. Səbəb sadədi: həm Braziliya, həm də Argentina yığması artıq bu ilin son aylarında Qətərdə keçiriləcək mundialda iştirakını təmin edib.