Misli premyer-liqasının 33-cü turunda “Sumqayıt” evdə “Qarabağ”a məğlub oldu – 3:4.

“Football-plus.az” xəbər verir ki, oyunsonrası mətbuat konfransında Saşa İliç jurnalistlərin suallarını cavablayıb.

- Maraqlı oyun oldu. Hər iki komanda yaxşı oynadı. Yetərincə qollar oldu. Səhvlərimizdən qollar buraxdıq.

- Ayrılacağınız deyilir. Azərbaycandan hansı təəssüratla ayrılacaqsız?
- Sumqayıt şəhəri haqda gözəl təəssüratım var. Gözəl insanları var. Top-klub olmasaq da, əlimizdən gələni etdik.

- Niyə gedirsiz? Özünüz istəyirsiz?
- Müqaviləmin müddəti başa çatır. Prezidentlə söhbətimiz olacaq. Hədəf avrokuboklar olacaqsa, kifayət qədər xərcə düşməliyik, transferlər edilməlidi. Mövcud futbolçular pis deyil, amma reallıq da var. Səviyyəli komanda minimum səhv etməlidi.

- Məşqçi kimi bir yerdə çox qalmamısız. Səyahət etməyi xoşlayırsız, yoxsa özünüzə yer tapmırsız?
- (gülür). Hər şey məndən asılı deyil. Bəzi ölkələrdə işləmişəm. Mənim üçün yeni, maraqlı təcrübə oldu. Elə bu klub da. Ən yaxşı stadion, təlim-məşq bazası bizim klubdadı.

- Hədəfinizin avrokuboklar olduğunu demişdiz. Həmin günə qayıtsaq, yenə eyni açıqlamanı verərsiz?
- Əsas avrokuboklar deyil. “Lester” də çempion olmuşdu. Kiçik səhvlərdən xeyli xallar itirmişik. Futbolçular bunu dərk etməlidi. Səhv olmasa, uğur da olar.

- “Qarabağ”la iki oyunda sona qədər mübarizə apardız, birində qələbə qazandız. Belə oyun mövsüm ərzində niyə sabit olaraq olmadı?
- Baxışım başqadı. Bu gün uduzduq. 3 qol vursaq da, 4 qol buraxdıq. Maksimalist insanam. 20 zərbə endirdik, amma nə qədər səhv etdik. Əsas odu ki, səhv olmasın. Məğlubiyyət məğlubiyyətdi. Əsas problemimiz çox qol buraxmaq idi. Çünki çox səhv edirik.

MÜZƏFFƏR QULUZADƏ