Ölkəmizdə amansız tənqidlə üzləşən Nəriman Axundzadə ABŞ-də “günə çıxıb”.

Sağlığına qismət, ildə 935 min manat qazanacaq. Qürbətdəki azərbaycanlılar da onun xətrini çox istəyir. “Kolumbus Kryu”nun oyunlarından Azərbaycan bayrağı da əskik olmur, həmvətənlərimizin dəstəyi də. Bugünlərdə yayılan videolardan o da görünür ki, Nəriman bu sevgiyə layiq olmağa çalışır. Sadəcə, təəssüf ki, təkcə mənəvi mənada. Yəni adını səsləyənlərə cavab verir, görüşür, forma bağışlayır, necə deyərlər, heç kimi əliboş qaytarmır. Öz aramızdı, Ohayo təmsilçisi də Nərimanın sevildiyinin fərqindədi. Klub nə vaxt bizimkini paylaşsa, postlarına onminlərlə baxış, bəyənmə, rəy gəlir. Odu ki, səhifələrinin fəal olmasını, gündəmdə qalmaq istəyən SMM qrupu tez-tez “repertuar”ında Axundzadəyə yer verir.

Hə, Nəriman, daha qazan-qazan ləvəngi gəlir, klubdan və azarkeşlərdən dəstək görürsən, pulun da var. İndi nəyin çatmır?! MLS-də 6 matçda meydana çıxmısan və cəmi 30 dəqiqə forma geymisən. Qol və məhsuldar ötürmə hesabını da aça bilməmisən... Ləvəngi mərhələsini arxada qoymaq, işə başlamaq lazımdı! Daha amansız təzyiqə, tənqidə məruz qalmırsan ki, psixoloji durumun qaydasında olmaya.

KƏNAN BAHADIR