Mövsümə iddialı başlayan “Araz-Naxçıvan” hazırda yalnız autsayderlərdən öndədi. “Qırmızı-ağlar”ın avrokuboklara vəsiqə qazanmaq şansı çoxdan tükənib. Komandanın ev oyunlarını Bakıda keçirməsi, azarkeş dəstəyi baxımından sonuncu sırada qərarlaşması, idarəçilikdə özünü büruzə verən ciddi problemlər, həm baş məşqçi, həm də futbolçu seçimlərinin yanlışlığı kimi amillər naxçıvanlıların 7-ci pilləyə qədər geriləməsinə səbəb olub.

Təbii ki, klubun qısa müddətdə aradan qaldırmalı olduğu xeyli problem var. Bəlkə də ilk ayrılığın – dünən Vanderson Melo yola salındı – hələ mövsüm bitmədən reallaşması məhz görüləcək işlərin çoxluğuyla bağlıdı. Patrik Andradenin də adı “Zirə” ilə yanaşı hallanır. Ümumiyyətlə, sərfəli təkliflər alan perspektivli futoblçuların komandada qalmayacağı dəqiqdi. Odu ki, mövsümlərarası fasilədə heyətdə genişmiqyaslı dəyişikliklər olacaq. Heç şübhəsiz, Andrey Demçenko ilə yolların ayrılması da gözlənilir. Onunla “5 ay+1 il” şərti ilə imzalanan müqaviləyə mayın sonunda xitam verilməlidi. Azı ona görə ki, “qırmızı-ağlar” onun rəhbərliyi altında 4 qələbəyə, 2 heç-heçəyə, 9 məğlubiyyətə imza atıb. Axı həm də hər uğursuz nəticədən sonra ad çəkmədən bəzi futbolçuları qəssdən oynamamaqla günahlandırmaq, yumşaq desək, peşəkarlığa sığmır. Adam bircə dəfə güzgüyə baxmazmı?!

Mütləq burdan başlamaq lazımdı. Daha sonra maliyyə durumunu düzəltməli olan “Araz-Naxçıvan” yeni baş məşqçi və möhkəmləndirilmiş heyətlə yola çıxmalı, növbəti dəfə avrokuboklarda iştirak uğrunda mübarizə aparmalıdı. Yoxsa futbolun sürətlə dəyişən çöhrəsi bu komandanı premyer-liqada qalmaq uğrunda döyüşənlərdən biri olmağa məhkum edəcək. Həmin vaxt klub rəhbərliyi özündən başqa kimdəsə səhv axtarmasın!

KƏNAN BAHADIR