"Sabah" Misli premyer-liqasının 29-cu turunda evdə "Karvan-Yevlax"a 2:0 hesabıyla qalib gəlməklə çempionluğa bir addım da yaxınlaşdı.

“Football-plus.az” bu komandanın baş məşqçisi Valdas Dambrauskasın mətbuat konfransından hesabatı təqdim edir.

- Bizim üçün çox çətin, ağır oyun alındı. Bu da gözlənilən idi. Çünki "Qarabağ"a qarşı iki vacib oyun keçirmişdik. Həmin matçlarda çox enerji itirmişdik. Səviyyəmizdən aşağı çıxış etdik. Birinci hissədə istədiyimizdən zəif oynadıq. İkinci yarıda daha çox qol imkanımız oldu. Fasilədən sonra oyuna enerji ilə daxil olduq. Qələbəni daha çox istəyən tərəf biz idik. Hər iki komanda 10 nəfərlə qalanda top saxlamağa çalışdıq. Rəqibin risk edəcəyini gözləyirdim. Amma riskə getmədilər. Yenə 5-4 sisteminə sadiq qaldılar, hücumçusuz çıxış etdilər. Azarkeşlər üçün o qədər də baxımlı oyun alınmadı. Hər oyunu eyni şəkildə keçirə bilmərik. Ən önəmlisi odu ki, 3 xal qazandıq. Yolumuza davam edirik. Qısa müddətdə bərpa olunub, "Şamaxı" ilə oyuna köklənməliyik.

- Xəyal Əlliyev son vaxtlar az şans qazana bilmir. Start heyətində müntəzəm yer alması üçün nə çatmır?
- Rəqabət var. Çox yaxşı komandayıq. Hücumda güclü oyunçulara sahibik. Qələbə qazanırsansa, hücumçunu dəyişmək çətindi. Amma onu deyə bilərəm ki, Xəyal bu mövsüm bizə çox fayda verib. Mikelsin yoxluğunda çox yaxşı çıxış etdi. Çalışmağa davam etməli, öz üzərində daha çox işləməlidi ki, komandada əsas hücumçuya çevrilsin. Amma bu da asan deyil. Komandada çox yaxşı hücumçular var. Xəyalı başa düşürəm. Onun davranışı, yanaşması, döyüşkən ruhu çox xoşuma gəlir. Bəzən bizə başla yaxşı oynayan hücumçu lazım olur. O zaman lazım olan oyunçudan istifadə edirik. Bu, mənim qərarımdı və qərarımın arxasındayam. İnanıram ki, öz üzərində çalışmağa davam etsə, həmişə oynamaq imkanı qazanacaq.