Futbol üzrə ölkə çempionatının 2-ci liqasının cari mövsümündə ekzotik hesablar hədsiz çoxdu. Ona görə ki, komandalar arasında səviyyə fərqi dərindi. 8:0, 12:0, 10:1, 13:1, çoxdu e, çox...

Bu gün, yəni bir qədər əvvəl başa çatan oyunda “Xankəndi” “Kür-Araz”ın qapısından 14 top keçirib ki, bu da hər 6 dəqiqəyə bir qol deməkdi. Hakim Rəsul Babayev heç bir hissəyə vaxt artırmayıb. Ədalət naminə deyim ki... Elə bildiz hesabı əsaslandırmaq üçün İmişli komandasından hansısa futbolçunun meydandan qovulduğunu deyəcəm. Yox-yox, belə olmayıb, “Kür-Araz”dan cəmi iki futbolçu sarı vərəqə ilə cəzalanıb.

Hə, onu demək istəyirdim ki, 14:0 cari mövsümün rekordu deyil. “Xankəndi” 6-cı turda – oktyabrın 21-də “Araz Saatlı”nı da səfərdə məhz bu hesabla məğlub etmişdi. 14:0-ı təkrarlayan qarabağlılar son 15 oyunun hamısında qələbə qazanıb.

Onların əsas rəqibi “Qaradağ Lökbatan”ın hesabat turunda rəqibi “Şirvan”ı daha “təvazökar” hesabla (7:3) məğlub etdiyini də vurğulayaq.

ORXAN