Misli premyer-liqasının 22-ci turunun “Qarabağ” – “Sabah” oyunu təxmin oluna biləcək hesabla bitsə də, hadisələrin axarı hamını xeyli təəccübləndirdi. Artıq 60-cı dəqiqədə “bayquşlar”ın futbolçusu Coy-Lens Mikels azarkeşləriylə birgə komandasının üçüncü qolunu qeyd edirdi. Əlbəttə, Portuqaliya nəhənginin – “Benfika”nın meydanında 0:2 hesabıyla məğlub duruma düşsə də, qələbə qazanan “köhlən atlar” (3:2) bu məqamda “ağ bayraq qaldıra” bilməzdi. Odu ki, Masazır təmsilçisinin 73-cü dəqiqədən etibarən buraxdığı qollar üzündən qələbəni əldən verməsi əksər futbolsevərləri təəccübləndirmədi.

Çempionlar Liqasının pley-offuna vəsiqə qazanan komandanın belə önəmli oyunda son saniyələrə qədər vuruşmayacağını düşünmək sadəlövhlük idi. Qonaqlar bunu hesaba qatmadı. Meydan sahiblərini bir saat ərzində küncə sıxışdıran, hesabı darmadağın həddinə çatdıran “Sabah” son 30 dəqiqədə özünə bənzəmədi.

Bəlkə də baş hakim Tural Qurbanov final fitini vaxtından əvvəl səsləndirməsəydi, bu gün fərqli cür danışacaqdıq. Lakin indi geri yox, irəli baxmağın vaxtıdı. Axı hələ 3-cü dövrə, bir-birindən maraqlı keçəcəyi gözlənilən daha 11 tur var. Qurban Qurbanov demişkən, “Qarabağ” artıq “Sabah”ın gücünə daha yaxşı bələd oldu. Valdas Dambrauskas da başverənlərin onların xeyrinə olduğunu düşünməkdə haqlıdı. “Bayquşlar” öyrəndi ki, final fiti çalınmadıqca 3:0 hesablı üstünlük belə qələbə qazanmaq deyil.

Deməli, bizi 3-cü dövrədə daha gərgin və baxımlı “Qarabağ” – “Sabah” dueli gözləyir. Bu komandaların ölkə kubokunun yarımfinalında qarşılaşmaq ehtimalının yüksək olduğunu da nəzərə almalıyıq. Bəllidi ki, həmin matçlar reallaşsa, həm Qurbanov, həm də Dambrauskas rəqibini daha yaxşı təhlil edəcək.

Kəsəsi, uzun müddət sonra ilk dəfə bu cür oyuna şahidlik etdik və görünür, azı bir belə matç da izləyəcəyik. Bəlkə də onda həm qalibin, həm də çempionun adını öyrənmiş olacağıq.

Bugünün qalibi “Sabah”dı, sabahın qalibini isə məhz “Sabah” “təyin edəcək”. Çünki artıq “Qarabağ”ın taleyi öz əlində deyil! Bundan sonra keçirəcəyi bütün qarşılaşmalarda qələbə qazansa belə!

KƏNAN BAHADIR