''Beşiktaş''da Rafa Silvanın baş qəhrəmanı olduğu sabun operası yavaş-yavaş başa çatır.

Portuqaliyalı ulduzla bağlı yeni mühüm xəbər var. Belə ki, ''Benfika''nın idman direktoru Mario Branko transferi tamamlamaq üçün İstanbula gəlib. Simvolu ''qartal'' olan bu iki klub arasında bütün prinsipial məsələlərdə anlaşma əldə olunub. Qeyri-adi bir şey baş verməsə, 32 yaşlı futbolçu çərşənbə günü - yanvarın 21-də Türkiyədən ayrılacaq.

Portuqaliyanın ''A Bola'' nəşrinin yazdığına inansaq, ''Benfika'' qarşı tərəfə bonuslarla yanaşı 5 milyon avro təklif edib. ''Beşiktaş'' isə 7 milyon avro tələb edirdi. Məhz Brankonun İstanbula gəlişindən sonra anlaşmaq mümkün olub. Rəsmi açıqlamanın ən qısa müddətdə veriləcəyi gözlənilir.

Beləcə Rafa Silvanın ilyarımlıq Türkiyə macərası başa çatmış oldu. Ulduz futbolçu Türkiyə karyerasını 65 oyun, 23 qol, 16 məhsuldar ötürmə göstəriciləri və bir superkubokla tamamlamış oldu.