Çempionlar Liqası
liqa mərhələsi, 5-ci tur
Napoli (Neapol, İtaliya) - Qarabağ 2:0 (0:0)
32. Vanya Milinkoviç-Saviç
4. Alessandro Buoncorno
(5. Juan Jezus, 90)
13. Amir Rrahmani
31. Sem Beukema
(21. Matteo Politano, 64)
17. Matias Olivera
8. Skott Maktominey
68. Stanislav Lobotka
22. Covanni Di Lorentso (k)
70. Noa Lanq
(20. Elif Elmas, 75)
7. David Neres
(26. Antonio Verqara, 90)
19. Rasmus Höylunn
(27. Lorentso Lukka, 75)
Ehtiyat oyunçular
14. Nikita Kontini
25. Matias Ferrante
69. Cüzeppe Ambrozino

99. Mateuş Koxalski
44. Elvin Cəfərquliyev
(18. Dani Bolt, 75)
81. Kevin Medina
(3. Sami Mmae, 60)
13. Bəhlul Mustafazadə
2. Mateus Silva
(27. Toral Bayramov, 75)
8. Marko Yankoviç
35. Pedro Bikalyo
10. Abdulla Zubir (k)
11. Emmanuel Addai
15. Leandro Andrade
(21. Aleksey Kaşuk, 60)
17. Kamilo Duran
(7. Nəriman Axundzadə, 75)
Ehtiyat oyunçular
1. Şahruddin Məhəmmədəliyev
97. Fabian Buntiç
55. Bədavi Hüseynov
6. Kris Kuaku
9. Xonatan Montiel
22. Musa Qurbanlı
Baş məşqçi: Qurban Qurbanov

Qollar: S.Maktominey, 65 (1:0). M.Yankoviç, 72-öz qapısına (2:0).
R.Höylunn 56-cı dəqiqədə penaltidən yararlana bilməyib (qapıçı).
Vərəqələr: K.Medina, 43. N.Lanq, 50. M.Yankoviç, 55. A.Rrahmani, 77 – sarı.
Hakimlər: ŞİMON MARÇİNYAK, Tomaş Listkeviç, Adam Kupsik, Voytsex Mix (hamısı Polşa).
VAR hakimi: Pol van Bukel (Niderland).
VAR hakiminin köməkçisi: İvan Bebek (Xorvatiya).
Hakim-inspektor: Paskal Pyer Qəribyan (Fransa).
UEFA nümayəndəsi: Pidar Rayan (İrlandiya).
25 noyabr. Neapol. “Dieqo Armando Maradona” stadionu. 32019 tamaşaçı.
İkinci hissəyə 6 dəqiqə əlavə olunub.

11 (8) qapıya (“çərçivə”yə) zərbə 11 (3)
6 künc zərbəsi 4
1 ofsayd 2
18 qayda pozuntusu 6
2 (0) sarı (qırmızı) vərəqə 2 (0)
51 topa sahibolma (faizlə) 49

Liqa mərhələsinin püşkü atılanda “Napoli” ilə oyundan xal gözləməyən futbol ictimaiyyətinin mövqeyi ötən müddətdə dəyişmişdi. “Qarabağ”ın ilk dörd oyunda göstərdiyi nəticə, həmçinin neapolluların ciddi kadr problemi ilə üzləşməsi hər kəsin iştahını artırmışdı.

Zarafat deyil, De Bruyne, Gilmor və Zambo-Anqissa, Spinatsola kimi futbolçuların xidmətindən zədə üzündən məhrum olan Antonio Konte ehtiyat oyunçular skamyasında 8 oyunçu əyləşdirmişdi ki, ikisi qapıçı idi. Adətən, taktiki sxem və start heyəti kimi məsələlərə mühafizəkar yanaşan Qurban Qurbanov “Çelsi” ilə oyunla müqayisədə bir məcburi dəyişiklik etmişdi: Kadinin əvəzinə start heyətində Addai yer almışdı. Qurban bəy belədə Zubirin oynadığı sol cinahı Addaiyə tapşırmış, Abdullanı isə Kadinin mövqeyinə çəkmişdi.

Zaman göstərdi ki, bu dəyişiklik əbəsmiş. Bəli, Addai yetərincə fəal idi, hətta üç dəfə qapıya uzaqdan zərbə də vurdu, amma “Qarabağ”ın həmişə Cəfərquliyevlə Zubirin yer aldığı sol cinahı əvvəlki qədər effektli olmadı.

Leysanla müşayiət olunan oyunun 6-cı dəqiqəsində Addai uzaqdan bəxtini sınadı. “Napoli” isə 15-ci dəqiqədə daha maraqlı hücum qurdu. Sağ cinahla irəliləyən Neres cərimə meydançasına yaxşı ötürmə versə də, Bəhlul Höylunnu qabaqlaya bildi. 35-ci dəqiqədə Lanq Mateusun nəzarətindən qurtulub topu qapı qarşısına göndərdi. Neres ayaqlarının ucu ilə penalti nöqtəsi yaxınlığından zərvə vurdu və Koxalski inanılmaz seyvlə qola imkan vermədi. Ümumiyyətlə, polşalı qapıçı həmin gün bütün zərbələrin qarşısını aldı, Bəhlulun tərs vuruşunun səbəb olduğu qola qədər. Hissənin sonunda Buoncorno uzun ötürmə ilə Di Lorentsonu zərbə mövqeyinə çıxarsa da, bəxtimiz gətirdi, daha dəqiqi, Bəhlul son anda özünü topun qarşısına atdı.

“Qarabağ”ın oyununu yaxşı təhlil edən Konte müdafiəçilərin arxasına verilən ötürmələrin təhlükə yaradacağını bilirdi və oyunçuları da ondan lazımi təlimat almışdı. 42-ci dəqiqədə Neres də “çərçivə”yə düşə bilmədi və beləcə komandalar fasiləyə qolsuz bərabərliklə yollandı.

Nəticədən narazı olan “Napoli” 2-ci hissənin əvvəlində təzyiqi bir qədər də artırdı. Qeyd-şərtsiz qolların təməli məhz bu zaman kəsiyində qoyuldu. 51-ci dəqiqədə Maktomineyin zərbəsindən sonra Medina tapança atəşi ilə üzləşən adam kimi yerə yıxıldı. Kolumbiyalı müdafiəçi həkim yardımından sonra meydana qayıtsa da, özünə gələ bilmədiyi hiss olunurdu. Bəlkə də bu epizodun təsiri altında olan, ümumiyyətlə, xoş təsir bağışlamayan Yankoviç 54-cü dəqiqədə Buoncornodan ara ötürməsi alan Di Lorentsonun qapıçı ilə üzbəüz qalmasına mane olmaq istəyərkən kobud oynadı və hakim dərhal “nöqtə”ni göstərdi. Koxalskinin Höylunnla dueldən qalib ayrılması “Qarabağ”ı silkələməsi, ən azı psixoloji üstünlük ağdamlıların tərəfinə keçməliydi. Təəssüf ki, belə olmadı. Qurbanov narahat görünən Medina ilə özünə bənzəməyən Leandronu oyundan alıb, Mmae ilə Kaşuku mübarizəyə qoşdu.

Cəmi 5 dəqiqə sonra “Napoli” hesabı açdı. Meydan sahibləri künc zərbəsini yerinə yetirdi, Bəhlulun tərs toxunuşundan sonra Koxalski topun tora düşməsinin qarşısını alsa da, Maktomineyin təkrar zərbəsi dəqiq oldu. 67-ci dəqiqədə Maktomineyin daha bir zərbəsinin qarşısını qəhrəmancasına alan

Koxalski 72-ci dəqiqədə yenə “ağ bayraq qaldırdı”. Daha bir bəsit qol buraxdıq. Buna qədər bir zərbəsi tirdən dönən Neresin başladığı təhlükəli hücumun sonunda Maktominey topu qapıya göndərmək istədi, Yankoviçin uğursuz toxunuşu “Qarabağ”ı oyuna mərkəzdən başlamağa məcbur etdi. Qurban bəy bundan sonra ümidləri doğrultmayan üç oyunçunu – Cəfərquliyev, Silva və Duranı, uyğun olaraq, Bolt, Bayramov və Axundzadə ilə əvəzlədi. Ancaq yenilər də oyunda məzmun dəyişikliyi yarada bilmədi, uzaqbaşı Nərimanın 90+1-ci dəqiqədəki tələsik zərbəsini xatırlatmaq olar.

Bəli, səfərdə “Napoli”yə 0:2 uduzan “Qarabağ” ilk 24 komanda arasına düşmək şansını bir qədər çətinə saldı. İndi əsas vəzifə dekabrın 10-da Bakıda keçiriləcək oyunda turnirin aşkar autsayderi “Ayaks”ı məğlub etməkdi.

ORXAN