"Sumqayıt" Misli premyer-liqasının evdə keçirilən 12-ci tur matçında "Qarabağ"a uduzdu - 2:4.

"Football-plus.az" xəbər verir ki, "kimyaçılar"ın baş məşqçisi Saşa İliç oyunsonrası mətbuat konfransında jurnalistlərin suallarını cavabladı.

- Azarkeşlərə təşəkkür edirəm. Bu gün stadion dolu idi və möhtəşəm atmosfer var idi. Məncə, baxımlı oyun oldu. "Qarabağ"a "Napoli" ilə matçda uğurlar arzulayıram. İlk 10 dəqiqə oyunumuz çox yaxşı alınmadı, amma buraxılan qoldan sonra toparlandıq. İkinci hissəyə yaxşı başlamışdıq. Təbii ki, qırmızı vərəqədən sonra "Qarabağ"a qarşı mübarizə aparmaq elə də asan olmadı.

- Rayan Senhadjinin qovulması, sonradan penaltini qola çevirə bilməməyiniz nəticəyə təsir etdimi?
- Qırmızı vərəqənin düzgün olduğunu düşünmürəm. Lakin, hakim artıq qərarını verib və heç nə dəyişməyəcək. "Qarabağ"ın hakim köməyinə ehtiyacı yoxdu. Aleksa Yankoviç oyunda olsaydı, penaltini o yerinə yetirəcəkdi. O, oyunda olmadığı üçün Aleksandr Ramalinqom zərbəni yerinə yetirdi. 

- Səbuhi Abdullazadə penaltini yerinə yetirmək istəyirdi, amma Ramalinqom buna icazə vermədi. Bu haqda düşüncələriniz necədi?
- Ramalinqomu başa düşürəm. Hücumçudu və qollar vurmaq istəyir. Səhv mənimdi. Gərək bunları əvvəlcədən müəyyənləşdirək. 

- "Qarabağ"ı cari mövsümdə məğlub edən yeganə komandasız. Bu gün də xal ala bilərdiz...
- "Qarabağ" Azərbaycanın ən güclü klubudu. Müəyyən şanlar var idi. Etdiyimiz səhvlər buna imkan vermədi. Xüsusi nəsə yoxdu. 

- Hakimlərin idarəçiliyi haqda düşüncəniz necədi?
- Hakimlikdən danışmağı sevmirəm. Lakin, mən olsaydım ikinci sarı vərəqəni verməzdim. O epizoddan sonra oyun çox dəyişdi. Azlıqda olsaq da, qol vurduq. Komandamdan razıyam. 

- İlk dövrədəki qələbəyə baxmayaraq "Sumqayıt" bu gün "Qarabağ"a qarşı daha yaxşı oynadı. Bu fikirlər razısızmı?
- Nəticə olaraq ilk dövrədəki matç daha yaxşı oldu. Azarkeşlər üçün isə, bu gün daha baxımlı futbol var idi. "Qarabağ"ın bundan sonrakı oyunlarda 2 qol buraxacağına inanmıram.