"Qarabağ"ın və İslandiya millisinin sabiq qapıçısı Hannes Haldorsson AFFA-nın mətbuat xidmətinə müsahibə verib.

"Football-plus.az" xəbər verir ki, o, DÇ-2026-nın seçmə mərhələsində bu gün keçiriləcək Azərbaycan - İslandiya matçı, ölkəmizdəki çıxışı və "Qarabağ" haqda sualları cavablandırıb.

- Azərbaycan və İslandiya yığmaları arasında keçiriləcək qarşılaşmadan gözləntiləriniz nələrdi?
- Oyun çətin olacaq. Reykyavikdə İslandiya çox yaxşı çıxış etmişdi, amma Azərbaycan evdə həmişə güclü oynayır. Ukrayna ilə öz meydançasındakı matçda qeydə alınan nəticə bunu göstərir. Buna görə də bizi çox çətin qarşılaşma gözləyir.

- Ukrayna ilə qrupda ikinci yer uğrunda mübarizə baxımından bu görüş İslandiya üçün həlledici sayıla bilərmi?
- Bəli, tamamilə həlledici oyundu. İslandiya ümidlərini son tura qədər qorumaq üçün mütləq qalib gəlməlidi.

- Reykyavikdəki ilk oyundan sonra Azərbaycan millisinin baş məşqçisi dəyişib. Sizcə, bu dəfə əvvəlkindən fərqli ssenari görə bilərikmi?
- Bəli, şübhəsiz fərqli olacaq. Azərbaycan evdə daha güclüdü və yeni baş məşqçi adətən komandaya əlavə motivasiya gətirir. İslandiya bunun fərqində olmalı və oyunda bütün gücünü ortaya qoymalıdı.

- 2018/19-cu illər mövsümündə Azərbaycanda “Qarabağ”ın formasını geymisiz və həmin komandadan bir neçə futbolçu indi milli yığmamızın üzvüdü. Bu, qarşıdakı oyunu sizin üçün daha çətin və ya emosional edirmi?
- Bəli, bu, matçı mənim üçün daha maraqlı edir. Reykyavikdəki görüşü izləmişdim, Şahruddin Məhəmmədəliyev, Mahir Emreli və digər sabiq komanda yoldaşlarımı meydanda görmək xoş idi. Şahruddin bir neçə möhtəşəm qurtarış etdi və əslində həmin oyunda əlindən gələni əsirgəmədi. Mahir də karyerasında çox irəliləyib.

- Azərbaycanda futbolçu kimi keçirdiyiniz günləri necə xatırlayırsız?
- Bakıda keçirdiyim günlərə böyük və xoş xatirə kimi baxıram. Bu, mənim həyatımda çox dəyərli bir təcrübə idi. Ailəmlə birlikdə Azərbaycanı tanımaqdan məmnunam. Hələ də yaxın dostum Nurlan Hüseynovla əlaqə saxlayıram və ona salamlarımı çatdırıram.

- Sonda, “Qarabağ”ın cari mövsümdə Çempionlar Liqasındakı çıxışı barədə fikirləriniz necədi?
- “Qarabağ”ın uğurlarına çox sevinirəm. Bu mövsüm əldə etdikləri nəticələr heyrətamizdir və bu da İslandiya üçün qarşıdakı oyunun nə qədər çətin olacağını göstərir. “Qarabağ” böyük klubdu və onlara gələcəkdə uğurlar arzulayıram.