Bu gün “Araz-Naxçıvan” “Omoniya”nı qəbul edəcək. Cənubi Kipr təmsilçisi son beş mövsümdə dördüncü dəfə Azərbaycanda meydana çıxacaq.

Sonuncu dəfə ötən mövsüm Konfrans Liqasının pley-off mərhələsində “Zirə” ilə qarşı-qarşıya gəliblər. “Omoniya” Bakıdakı – cavab oyununda 0:1 məğlub olsa da, ilk görüşdə “qartallar”ı darmadağın etmişdi - 6:0.

Bəs ötən mövsümlə müqayisədə Nikosiya klubunun heyətində hansı dəyişikliklər var?

Qapıçılar eynidi - hər üç qapıçı ötən mövsüm də heyətdə olub. Gəncləşdirmə siyasəti aparan komanda 32 yaşlı müdafiəçi Filip Helanderlə yolları ayırıb. Əvəzində akademiyanın yetirmələri heyətə cəlb olunub. Müdafiə xəttində ən yaşlı futbolçular Senu Kulibali və Stefan Simiçdi – hər ikisinin 30 yaşı var. Yarımmüdafiəçilərdən Xaralambos Xaralambus var idi ki, artıq “Aris Limassol”un futbolçusudu. Hücum xəttində isə nə gedən, nə də yeni transfer var.

Qeyd edək ki, Tasos Xatziqiovannis zədə səbəbindən oyunu buraxacaq.

MÜZƏFFƏR QULUZADƏ