Azərbaycan UEFA-nın reytinq cədvəlində mövqeyini daha da möhkəmləndirib.

"Football-plus.az" xəbər verir ki, "Qarabağ"ın Çempionlar Liqasının 3-cü təsnifat mərhələsində Şimali Makedoniyada "Şkendiya" üzərində qazandığı 1:0 hesablı qələbədən sonra ölkə aktivinə daha 0,250 xal gəlib. Nəticədə ümumi xal sayı 19.000-a çatıb.

Belə nəticədən sonra Azərbaycan 28-ci pillədə qalsa da, tezliklə irəliləmək üçün əlverişli imkan qazanıb.

Bu, sabah "Araz-Naxçıvan"ın Cənubi Kipr "Omoniya"sına qarşı evdə, "Sabah"ın isə Bolqarıstan "Levski"sinə qarşı səfərdə keçirəcəyi Konfrans Liqasının 3-cü təsnifat mərhələsinin ilk oyunlarındakı nəticələrindən asılı olacaq.

Hazırkı mərhələdə qələbəyə 0,250 xal, heç-heçə 0,125 xal verilir.

Qeyd edək ki, 27-ci yerdə gedən Ukraynanın 19.225 xalı, 26-cı pilləni tutan Sloveniyanın 19, 593 xalı var. Ukrayna təmsilçisi olan Kiyev "Dinamo"su dünən Çempionlar Liqası matçında qəbul etdiyi Cənubi Kipr "Pafos"una uduzub - 0:1.