Bakıda keçirilən şahmat üzrə “Çempionların savaşı” turniri başa çatıb. Rapid və blits oyunlarının nəticəsinə əsasən Rauf Məmmədov özbəkistanlı Rüstəm Kasımcanovu 12:10 hesabı ilə üstələyib.

Qadınlar arasında ölkə çempionatının qalibi Günay Məmmədzadə isə bolqarıstanlı Antoaneta Stefanovaya eyni hesabla qalib gəlib.

Turnirin bağlanış mərasimində Gənclər və İdman Nazirliyinin nümayəndələri, Azərbaycan Şahmat Federasiyasının (AŞF), həmçinin Beynəlxalq Şahmat Federasiyasının rəsmiləri və digər qonaqlar iştirak edib. Əvvəlcə yarışla bağlı videoçarx təqdim olunub. Ardınca yarış iştirakçıları şahmat taxtasına imzalarını atıblar.

Daha sonra AŞF-nin prezidenti Mahir Məmmədov çıxış edərək qalibləri təbrik edib.
Sonda turnirin qalibi olan Rauf Məmmədovla Günay Məmmədzadəyə hədiyyələr təqdim olunub. Kasımcanovla Stefanovaya da xatirə hədiyyəsi verilib. Həmçinin Xalça Muzeyinin rəhbərliyinə də xatirə hədiyyəsi təqdim olunub. Mükafatları Mahir Məmmədov və Gənclər və İdman Nazirliyinin idman şöbəsinin rəhbəri Elnur Məmmədov təqdim edib.

Turnir vaxtı AŞF-nin İcraiyyə Komitəsinin də iclası keçirilib. Milli Xalça Muzeyində təşkil olunan toplantıda qonaq qismində Beynəlxalq Şahmat Federasiyasının (FIDE) prezidenti Arkadi Dvorkoviç, FIDE rəsmisi, ikiqat dünya çempionu, Ümumdünya Şahmat Olimpiadasının qalibi Çju Çen, Türkiyə Şahmat Federasiyasının (TŞF) prezidenti Fəthi Apaydın da iştirak edib. AŞF prezidenti qonaqlara “Baku Open-2025”in açılış mərasiminə qatıldıqları üçün təşəkkür edib. O, rəhbərlik etdiyi qurumun FIDE və TŞF ilə əməkdaşlığının genişləndirilməsi istiqamətində mühüm işlər aparacağını bildirib. AŞF prezidenti Çju Çenə xatirə hədiyyəsi təqdim edib.

Sonra İcraiyyə Komitəsində AŞF-nin hesabat-seçki konfransı ilə bağlı müzakirələr aparılıb.