Çempionlar Liqasında ilk yarımfinalçılar bəlli oldu.

''Football-plus.az'' xəbər verir ki, ilk görüşdə məğlub olanlar geridönüş etsələr də, bu, mərhələni adlamaq üçün kifayət etmədi.

''Aston Villa'' ilə PSJ-nin dueli kuryoz olayla start götürdü. Belə ki, qarşılaşmadan öncə ''Villa Park''da Çempionlar Liqasının əvəzinə Avropa Liqasının himni səsləndirildi. Həmin anda parisli futbolçuların sifətlərini ''turşutmaları'' sosial şəbəkələrdə maraqla qarşılandı. İlk oyunda 3:1 qalib gələn Paris nəhəngi cavab oyununda da 27 dəqiqəyə vurduğu iki qolla ümumilikdə 4 topluq üstünlük əldə etdi. ''Aston Villa'' qalan müddətdə tələb olunan 4 qoldan yalnız 3-nü vura bildi. Donnarumma önəmli seyvlərlə komandasını fiaskodan xilas etdi.

Beləliklə, PSJ ÇL-də ardıcıl ikinci, ümumilikdə tarixi ərzində isə avrokuboklarda 9-cu dəfə yarımfinala yüksəldi. Parislilər bu göstəricidə ''Marsel''i geridə qoyaraq Fransanın ən uğurlu kollektivinə çevrildilər.

Dortmundda keçirilən digər oyuna isə Seru Girassi damğa vurdu. ''Barselona'' ilk qarşılaşmada 4 cavabsız qolla qalib gəlsə də, cavab oyununda da favorit sayılırdı. Çünki komanda əla formada idi və 2025-ci ildə heç kimə uduzmamışdı. Amma Girassinin bununla bağlı öz fikri var idi. Bu futbolçu həm ilk yarının, həm də ikinci yarının əvvəllərində fərqlənməklə dubl etdi. ''Borussiya'' fanatları tarixi geridönüşün xəyallarını qurmağa yeni başlamışdılar ki, Bensebayni topu öz qapısına göndərməklə bu xəyalları puç etdi. Qalan müddətdə Girassi yenə səhnəyə çıxaraq həm het-trik etdi, həm də yekun nəticəni müəyyənləşdirdi. Amma 3:1-lik qələbə ''Borussiya''ya yetərli olmadı. ''Barselona''nın rəsmi matçlarda 24 oyunluq məğlubiyyətsiz seriyası qırılsa da, komanda 6 illik həsrətə son qoyaraq 2019-dan bu yana ilk dəfə yarımfinala yüksəldi.

Girassinin rekordlarına gəlincə, onun ilk növbədə ÇL-də ''Barselona''ya qarşı het-trik edin və bir mövsümdə bu turnirdə kataloniyalılara 5 qol vuran ilk futbolçu olduğunu bildirək. Qvineyali forvard eyni zamanda ÇL-də bir mövsümdə 12 qol həddinə çatan ilk afrikalı futbolçu oldu.

Və nəhayət, buna qədər ''Borussiya''nın heyətində də ÇL-də bir mövsümə bu qədər qol vuran futbolçu olmamışdı. Ən yaxşı göstərici 10 qol idi. Buna 2012/13-də Levandovski və 2020/21-də Holann nail olmuşdu.