Millimizin Haiti və Belarusa qarşı keçirdiyi yoldaşlıq oyunlarıyla bağlı xeyli məlumatı diqqətinizə çatdırmışıq.

"Futbol+"in xəbər lentində məhz komandayla bağlı bir çox xəbərlə tanış ola bilərsiz. Əlbəttə, hələ toxunulmayan mövzular var və məsələni diqqətdə saxlamağa davam edəcəyik. Budəfəki məramımızın səbəbi isə başqadı. İndi meydandan kənara boylanmaq lazımdı. Daha doğrusu, tribunalara.

Yığmamızı Haiti ilə oyunda 3500, Belarusla matçda isə 2552 tamaşaçı dəstəklədi. Və onların əksəriyyəti, daha dəqiqi, fanklublardan başqa, demək olar ki, hamısı yalnız və yalnız tamaşaçı idi. İzlədilər, getdilər. Nə hansısa dəstək şüarı səsləndirdilər, nə də hansısa formada yığmamızın yanında olduqlarını sübut etməyə çalışdılar. Bəli, uğursuz nəticələr bir-birini əvəzləyir. Bəli, burda nəinki AFFA, baş məşqçi Fernando Santuş və köməkçiləri, futbolçular, hətta biz jurnalistlər də günahkarıq. Bəlkə də azarkeşlərin bütün başverənlərə görə zərrəcə günahı yoxdu. Amma...

Bu o demək deyil ki, Haiti millisini 4-cü qolu vurmağa səsləmək olar. Bu o demək deyil ki, Belarus yığmasının qələbəsinə sevinmək, bunu onlarla birlikdə qeyd etmək olar. Bu o demək deyil ki, futbolçuları təhqir etmək, hətta onların üzərinə hücum çəkməyə çalışmaq olar. Olmaz!

Milli komanda nəticələrindən asılı olmayaraq bizimdi. "Vətən! Millət! Sakarya!" deyib hansısa günahkarı sudan quru çıxarmaq niyyətində deyiləm. Səbəbkarlar azı öz vicdanları qarşısında cavab verməlidi. Amma heç kimin millimizi aşağılamağa, xüsusilə rəqib qarşısında kiçiltməyə haqqı yoxdu. Ayıbdı, xanımlar və cənablar...

Millimizin oyunu və qeydə alınan nəticələr nə qədər biabırçıydısa, həmin fraqmentlər də bir o qədər biabırçı idi!

KƏNAN BAHADIR