Misli premyer-liqasında 27-ci tura yekun vuruldu. Bu o deməkdi ki, 3-cü dövrə geridə qaldı və komandaları qarşıda həlledici mərhələ gözləyir: son dövrə, mümkün 27 xal və premyer-liqada qalmaq uğrunda mübarizə aparanlarla avrokuboklara yollanmaq istəyənlər üçün hər biri finala bərabər 9 matç!

Kimin istəyinə çatacağını hələ bilmirik. Amma 3-cü dövrə çərçivəsində baş tutan matçlar mövsümün yekunları haqda müəyyən fərziyyələr yürütməyə, gözlənilən nəticələrin cizgilərini cızmağa əsas verir. Əsas məsələlərdən biri premyer-liqanı tərk edəcək komandanın kimliyidi ki, bu yöndə ən real namizəd “Səbail”di. Düzdü, biz bunu hələ Cavid Hüseynov baş məşqçi postuna gətirələcəyi yönündə xəbərlər yayılanda demişdik. Lakin nə mütəxəssis sözə qulaq asdı, nə də “Səbail”in söz sahibləri. İndi “dənizçilər” Elvin Məmmədovun bilik və bacarıqlarına arxalanacaq ki, bunun da nəyəsə yarayacağına inanmaq çətin məsələdi.

Hər halda, sonuncu pillənin sahibinə böyük ölçüdə aydınlıq gəlib. Hələ ki bu yöndə xüsusi təhlillər aparmağa ehtiyat yoxdu. Yalnız 9-cu sırada qərarlaşan və Bayıl təmsilçisindən 5 xal irəlidə olan “Kəpəz” büdrəyəcəyi, “Səbail” isə xal ehtiyatını artıracağı halda mövzuya qayıtmaq olar. İndi diqqəti avrokuboklar uğrunda mübarizə aparan komandalara yönəltmək vacibdi ki, “Qarabağ”la “Zirə”ni bu mövzudan kənarda saxlamalıyıq. Ona görə ki, həm Qurban Qurbanovun, həm də Rəşad Sadıqovun komandası sabit nəticələr qazanır və ilk iki pilləni əldən vermək niyyətində deyil. Bəs, qalan iki komanda hansı olacaq? Bax, indi məhz bu məsələ futbol ictimaiyyəti üçün çox maraqlıdı.

Daha detallı danışaq. İki vəsiqə uğrunda mübarizə aparan üç komanda “Araz-Naxçıvan”, “Sabah” və “Turan Tovuz”du. Təbii ki, burda söhbət məhz çempionat yoluyla Avropa meydanlarında döyüşməkdən gedir. Belədə komandaların 3-cü dövrədə qazandığı nəticələrə diqqət yetirmək yerinə düşər. Belə ki, son 9 oyunda “qırmızı-ağlar” 8, “bayquşlar” 9, “bozqurd” 11 xal qazanıb. Amma rəqəmlər sizi aldatmasın. “Turan Tovuz” Muxtar Respublika və Masazır təmsilçilərinin ölkə kubokunda da mübarizəsinin davam etdiyini nəzərə almalı və daha çox xal qazanmalıydı. Kurban Berdıyevin yetirmələri qeyri-sabit nəticələr üzündən buna nail ola bilmədi və işini xeyli çətinləşdirdi. “Qırmızı-ağlar” ilk iki dövrədə qazandığı xallar sayəsində bir pillə gerilədisə, “Sabah” yalnız ölkə kubokuna bel bağlayacaq hala düşdü.

Ümumiyyətlə, komandaların şanslarını dəyərləndirmək çətindi. Demək olar ki, qüsursuz heyətə malik “bayquşlar” təcrübəsiz Vasili Berezutskinin, həm kasad, həm də fiziki və psixoloji çatışmazlıqlarla zəngin “bozqurd” isə böyük təcrübəyə malik Kurban Berdıyevin sərəncamındadı. Bu baxımdan “Araz-Naxçıvan”ı fərqləndirə bilərik. Bacarıqlı futbolçuların şərəfini qoruduğu komandanı Berdıyev qədər olmasa da, təcrübəli Elmar Baxşıyev çalışdırır. İş orasındadı ki, burda da zədəli və cəzalı futbolçuların çoxluğu kollektivin tam potensialını sərgiləməsinə imkan vermir. Əlbəttə, bu amillər adı çəkilən komandaların uğurlarının davamlı olmasına əngəl yaradır. Bu üzdən əvvəlki nəticələrdən tutarlı dəlil kimi bəhs etmək faydasız görünür. O başqa məsələ ki, Muxtar Respublika təmsilçisini “Sabah” və “Turan Tovuz”a nisbətən şanslı saymaq olar.

Fərqli baxış bucağına da ehtiyac duyduğumuzdan hadisələrin axarını yaxından izləyən təcrübəli mütəxəssis, yığmanın sabiq məşqçisi Arif Əsədovun da fikirlərini öyrəndik: