Gözlənildiyi kimi, “Yuventus” Danilo ilə yolları ayırıb. İtaliya klubunun rəsmi saytının məlumatına görə, 33 yaşlı müdafiəçinin müqaviləsinə qarşılıqlı razılaşma ilə xitam verilib.

"Football-plus.az" xəbər verir ki, bəzi mənbələr braziliyalı futbolçunun “Napoli”yə keçəcəyini iddia edir. 2019-cu ildən “Yuventus”da çıxış edən Danilo “ağ-qara” formada ümumilikdə 213 oyun keçirib və 9 qol vurub. O, rəhbərliyin qərarı ilə ötən ilin sonlarından əsas komanda ilə məşq etmək imkanını itirmişdi. Turinlilərin sabiq kapitanı vətəni Braziliyaya yollanmaq üçün gəldiyi hava limanında ayaqüstü jurnalistlərin bir sıra suallarını cavablayıb.

- Komandadan bu şəkildə ayrılacağınızı təsəvvür edirdiniz?
- Yerli publika ilə stadionda vidalaşmaq, burdan fərqli şəkildə ayrılmaq istərdim. Bununla belə, indi özümlə yalnız xatirələri aparıram. Turində və “Yuventus”da keçirdiyim 5 il ərzində şəxsiyyət, kişi və futbolçu kimi inkişafa nail oldum və indi gözəl xatirələri özümlə aparıram.

- Burda kapitandan lazımsız oyunçuya da çevrildiniz...
- Bu sual mənə verilməməlidi. Mən komandaya həmişə kömək etməyə hazır olmuşam, həmişə öz işimi can-başla yerinə yetirmişəm. Fikrimcə, münasibəti ifadə edən amil komanda ilə bağlılığımdı. Bu hissi ömrümboyu qoruyub saxlayacağam. Klub və məşqçinin verdiyi qərar isə mənlik deyil, mən məlum qərara təsir edə bilməzdim.

- Burda sizin üçün hər şeyin sona çatmasına təəssüflənirsiz?
- Yox, təəssüflənmirəm. Dediyim kimi, işimə bütün mənalarda həmişə bağlı olmuşam. Yalnız azarkeşlərlə stadionda vidalaşa bilməməyimə təəssüf edirəm. Vicdanım təmizdi. Bu komandadakı ilk günümdən son günümə qədər işimə böyük məsuliyyətlə yanaşmışam.

- “Yuventus”un futbolkası sizin üçün hansı anlamı daşıyır?
- Bu, karyeramın ən vacib futbolkasıdı. “Yuventus”da keçirdiyim illər ərzində futbolçu kimi yeni səviyyəyə yüksəlmişəm. Və buna görə kluba yalnız “sağ ol” deyə bilərəm.

- İtaliyada nəyi və ya hansı hadisəni heç vaxt unutmayacaqsınız?
- Mənim üçün unudulmaz olan həm yaxşı, həm də pis xarakterli çox hadisə baş verib... Adətən qələbələr yadda daha çox qalır. Ancaq Çempionlar Liqasında “Makkabi”yə uduzduğumuz matçdan sonra bizi çempionatda derbi gözlədiyini yaxşı xatırlayıram. Həmin anda komanda kimi birləşdik, “Torino” ilə oyundan əvvəl hamılıqla dairə formalaşdırdıq. Bu hal sonra bizim üçün adətə çevrildi və “Yuventus”u xarakterizə edən xüsusiyyətləri geri qaytardıq. Həmin xüsusiyyətlər komandanın son vaxtlar bir qədər itirdiyi birlik və bir ailə olmaqdı. Xatırlatdığım həmin gün mənim üçün çox dəyərlidi. Çünki o gün mənim üçün yalnız çətinliklər deyil, həm də inkişaf məqamı kimi yadda qalıb.

- Tifozi ilə münasibətləriniz necə idi?
- Onları ömrümboyu ürəyimdə saxlayacağam. “Yuventus” elə azarkeşlər deməkdi. “Yuventus” onlardı və həmişə belə olacaq. Artıq arxada qalan illərə görə sizə də “sağ olun” deyirəm. Bir neçə həyəcandolu ana görə məni bağışlayın, amma biz mütləq yenidən görüşəcəyik.

- Sosial şəbəkədə yazdığınız vida cümlələrinizdə “fantastik layihələr” deməklə nələri nəzərdə tuturdunuz?
- Mən sizin və hamının anladığı mənanı nəzərdə tutmuşam. Bu mənada heç nə əlavə etmək istəmirəm. Uşaqlara və komandaya uğurlar diləyirəm. Bundan sonra “Yuventus”un azarkeşi olacağam. Başqa yerdə də xoşbəxt olmağa çalışacağam.