"Olimpiakos" sabah Avropa Liqasının əsas mərhələsinin 8-ci turu çərçivəsində "Qarabağ"ı qəbul edəcək.

"Football-plus.az" xəbər verir ki, Yunanıstan təmsilçisinin baş məşqçisi Xose Luis Mendilibar oyunöncəsi mətbuat konfransında jurnalistlərin suallarını cavablandırıb.

- Oyunçular "Qarabağ"ın indiyə qədər avrokuboklarda qarşılaşdığınız ən zəif rəqib olduğunu düşünə bilər. Buna qarşı hansı tədbirləri görmüsüz?
- "Qarabağ"ı məğlub etmək məcburi deyil. Amma qalib gəlmək, bunu istəmək və məqsədimizə çatmaq üçün əlimizdən gələn hər şeyi etmək məcburidi. "Qarabağ"ı ən zəif rəqib kimi qəbul etmirik. Bəli, onlar cari mövsümdə yaxşı nəticələr qazana bilməyib. Lakin bu, komandanın rəqabət baxımından zəif olduğu mənasına gəlməməlidi. Hədəfimizə çatmaq üçün səhvsiz oynamalıyıq. "Qarabağ"a qalib gəlmək üçün səy göstərəcəyik.

- "Qarabağ" duran toplarda çox yaxşı performans göstərir. Məşqlərdə bu məqam üzərində çalışmısızmı?
- Xüsusi özəlliklərə zaman ayıracaq qədər vaxtımız olmayıb. Ümumiyyətlə, bir çox məsələyə qarşı tədbirlər görməyi düşünürük. Amma rəqibin qapısından qol keçirməyin yalnız bir yolu yoxdu. Qol vurmaq üçün mümkün olan bütün yollardan yararlanmaq istəyirik.

- Qarşıda sıx qrafik var. Belədə heyətdə hansı rotasiyaları etməyi düşünürsüz?
- Adətən, belə hallarda müəyyən dəyişikliklər olur. Start heyətiylə bağlı yekun qərar oyunöncəsi sonuncu məşqdən sonra veriləcək. Hər halda, indiyə qədər hər şey qaydasında olub. Çox güman kı, hansısa dəyişikliyə ehtiyac olmayacaq.

- Avrokubokların yeni formatı haqda nə düşünürsüz? İndi hər oyunda fərqli rəqiblər var və hamısı özünəməxsus oyun stilinə sahibdi...
- Yeni formatı bəyəndim. Qrup mərhələsində rəqibləri təxmin etmək daha asan idi. Oyundan əvvəl hansı nəticənin məqsədəuyğun olacağını bilirdik. İndi hər addımda sürprizlə qarşılaşa bilərsən. Hər oyunda fərqli rəqibin olması mənim üçün yaxşı haldı. Belədə uğur qazanmaq çətin olur. Mən bu formatda rəqabəti daha çox sevirəm.

KƏNAN BAHADIR