AFFA-nın yeni inkişaf strategiyası ictimaiyyətə təqdim olundu.

2024 Azərbaycan futbolu, xüsusən də yığmalarımız üçün heç də yaxşı keçmədi, çoxlu arzuolunmaz nəticə qeydə alındı. İqor Ponomaryovla ilin yekunlarıyla bağlı çoxdan söhbət etmək istəyirdik. Məsələ uzandı, uzandı, nəhayət, köhnə-yeni ilin qeyd olunduğu yanvarın 13-dən sonra söhbətimiz baş tutdu.

- Ötən ili necə dəyərləndirirsiz? Həm şəxsən özünüz, həm “Sabah”, həm də Azərbaycan futbolu üçün. 
 - “Sabah”ın iki komandası Avropa yarışlarında çıxış edib: əsas və U-19 komandası. Ümumiyyətlə, Azərbaycan futbolu üçün nəticələr zəifdi.

- “Sabah” ötən il qarşısına qoyduğu məqsədlərə tam çatdımı? Sizi qane edən və etməyən hadisələr nə oldu? 
- Məqsədlərdən danışsaq, bəzi məqamlarda razı qaldıq, bəzən də yox. Eyni zamanda, biz nə üzərində işləməli olduğumuzu görürük. U-19-u götürsək, “Bazel”lə aramızda fərq olduğu aydındı, amma deyək ki, ikinci görüşdə bizim uşaqlar birinci görüşlə müqayisədə daha sərbəst və daha yaxşı oynadılar. Bu onu göstərir ki, Avropa komandaları ilə rəqabət apara bilərik.

 - Azərbaycan yığması D liqasına yuvarlandı, “Qarabağ” ilin ilk yarısında yaxşı nəticələr göstərsə də, ikincidə eniş yaşadı. Sizcə,“Qarbağ” niyə belə çətinliklə üzləşdi?
 - Təbii ki, millinin zəif çıxış etməsi çox məyusedicidi. Ümumiyyətlə, komandanın qarşısına hansı məqsədlər qoyulmuşdu? “Qarabağ”a ilk növbədə belə qiymət vermək lazımdı ki, azarkeşlər Azərbaycanda böyük komandalar, yaxşı oyunlar görür. İkincisi, biz bu oyunlardan nə gözləyirdik? Üçüncüsü, razılaşaq ki, komandalarımızdan biri Azərbaycanı beynəlxalq arenada layiqincə təmsil edir. 

- Bayram günü ürəyinizdə “Sabah”la bağlı hansı niyyət tutduz?
- Hədəfimiz qalır, dəyişməyib, ikinci yer uğrunda mübarizə aparırıq.

- Yeni baş məşqçi Vasili Berezutskinin qarşısına hansı hədəf qoyulub? Avrokuboklara qatılmaqla yanaşı, orda uğurlu çıxışmı?
- Vasili Berezutski bir futbolçu kimi karyerası ərzində çox şey əldə edib, biz buna hörmətlə yanaşırıq. İkincisi, o, baş məşqçi karyerasına indi-indi başlayır. Əvvəllər yalnız məşhur rusiyalı məşqçi Leonid Slutskiyə kömək edib. Düşünürəm ki, yaxşı təcrübə toplayıb, indi ondan yararlanmalıdı.

- Bir neçə gün əvvəl AFFA yeni inkişaf strategiyasını təqdim etdi. Bu strategiya Azərbaycan futbolunu yaxın gələcəkdə dəyişə biləcəkmi? 
- Ümid edək ki, belə olacaq.

- Ümumiyyətlə, Azerbaycan futbolunun əsas problemi nədi: zəif idarəçilik, kadr çatışmazlığı, yoxsa maliyyə?
 - Problemlərdən biri də futbolçularımızın keyfiyyətidi. İkincisi, infrastruktur yaxşılaşdırılmalıdı. Ümid edək ki, hər kəs ikiqat enerji ilə çalışacaq. Gənclərimiz beynəlxalq səviyyədə rəqabətə davamlı olmalıdı. Onda avrokuboklarda daha yaxşı oynayacağıq. 

- Yeni mövsümdən limitin tam götürüləcəyi deyilir. Bu qərar Azərbaycan futbolunu hara aparacaq? 
- Bunlar boş söhbətlərdi.

- Azərbaycanlıların legioner heyatı yaşamasından söz düşəndə bu fikri tez-tez işlədirlər ki, bizim futbolçuların mentallığı vətəndən kənarda oynamağa imkan vermir. Siz nəinki Azərbaycan, hətta SSRİ futbolunun ilk legionerlərindən birisiz. Mentallıqla bağlı düşüncələri bölüşürsüzmü? Siz İsveçdə legioner heyatina başlayanda hansi çətinliklərlə üzləşmişdiz?
 - Futbolçunun qarşılaşdığı ilk maneə dil biliyidi. Sonra mühitə uyğunlaşma gəlir. Və ən əsası futbolçunun özünün keyfiyyətidi. Bütün çətinliklər və narazılıqlar bu aspektdən qaynaqlanır.

RÖYANƏ OĞUZ