“Sabah” yanvarın 12-də “Şamaxı” ilə yoxlama görüşü keçirdi.

Ayın 4-də hazırlığa başlayan Masazır təmsilçisi yeni baş məşqçi Vasili Berezutskinin rəhbərliyi altında ilk təlim-məşq toplanışını arxada qoydu. Yanvarın 19-da “Neftçi” ilə  qarşılaşacaq “bayquşlar” artıq paytaxt derbisinə hazırlaşır.
Hazırlıqlar və yoxlama görüşü ətrafında komandanın aparıcı futbolçularından Coy-Lens Mikels ilə söhbətləşdik.

- Fasilə ərəfəsində səfərdə “Şamaxı”ya 1:3 hesabıyla məğlub olmuşduz. 120 dəqiqə davam edən yoxlama görüşündə isə iki cavabsız qolla qələbə qazandız. Oyunu necə şərh edərdin?
- Bu oyunun bir hissəsində meydana çıxdım. Düşünürəm ki, qarşıdakı oyunlara tam hazıram. Komanda şəklində də hazırıq. Mümkün olan nəticəni də çıxaracağıq.

- Qış hazırlığınız necə keçdi?
- Qış fasiləsində çox işləmişik. Spesifik detallar üzərində çalışdıq. Bir yoxlama görüşü keçirdik. Müəyyən vaxta da ehtiyacımız olacaq ki, məşqçinin isttədiklərini yerinə yetirək. İlk oyun üçün pis deyildik. Nəticə də göstərir ki, hazırıq.

- Yeni baş məşqçi Vasili Berezutski komandaya hansı yenilik gətirdi?
- Nizam-intizam, mövqe dəyişikliyi, oyunun daha sürətli getməsi deyə bilərəm. Sadəcə, vaxt lazımdı ki, məşqçimizin bizdən istədiklərini meydanda nümayiş etdirək.

- Hazırda turnir cədvəlinin 5-ci pilləsindəsiz. Konkret hansı yer üçün mübarizə aparacaqsız?
- Ən azı ikinci yer.

- Yanvarın 19-na qədər də bəzi detalları düzəltməli olacaqsız?
- Onsuz da yoxlama oyunu idi, ona görə də çox qiymətləndirməyə ehtiyac yoxdu. Hazırıq. Bu həftə “Neftçi”yə qarşı bunu meydanda daha aydın görə biləcəyik.

- “Neftçi” ilə oyundan gözləntilər...
- Qapıya zərbələr, yaxşı taktika. Yəni həmişəki kimi...

- Premyer-liqanın aparıcı legionerlərindən birisən. Legioner limitinin ləğv olunması ideyası barədə nə fikirləşirsən?
- Təbii ki, müsbət və mənfi cəhətləri var. Amma o barədə çox da fikir bildirmək istəmirəm.

- Mövsümün ilk yarısının nəticələrinə görə 8 qolla premyer-liqanın bombardirisən. Performansını necə qiymətləndirirsən?
- Bəli, premyer-liqanın bombardiriyəm. Nəticələr pis deyil. Bundan sonra da çalışçacam ki, mümkün qədər çox qol vurum. Əlimdən gələni edəcəm ki, komandam mümkün qədər çox qələbə qazansın.

- Qardaşın Leroy Mikelsin də “Sabah”a keçidi ilə bağlı söz-söhbət var. Ona dəstək olduğunu bilirik, amma rəqibin kimi necə görürsən?
- Transfer məsələləri ilə bağlı fikir bildirməyəcəm. Mən onun böyük qardaşıyam. Təbii ki, aramızda rəqabət deyilən bir şey yoxdu. Amma istərdim ki, qardaşım məndən nümunə götürüb daha yaxşı olsun. Təbii ki, mən də zirvədə qalmaq istəyirəm.

RÖYANƏ OĞUZ