Mussolininin nəticəsi karyerasında ilk qolu vurdu - fanatlar onu Roma salamı ilə alqışladı
İtaliyanın faşist diktatoru Benito Mussolininin nəticəsi Romano Floriani Mussolini karyerasında böyüklər arasında ilk qolunu vurub. Amma debüt qolundan daha çox italiyalı fanatların reaksiyası cəlbedicidi.
“Corriera dello Sera” nəşrinin yaydığı xəbərə görə, azarkeşlər stadionun direktoru qolun müəllifini elan edəndə sevinc hissi ilə məşhur Roma salamını işlədiblər.
“Transfermarkt”ın 500 min avro qiymət qoyduğu 21 yaşlı sağ cinah müdafiəçisi İtaliyanın 2-ci divizionunda mübarizə aparan “Yuve Stabiya”nın şərəfini qoruyur. Ancaq o, cari mövsümdən bu komandada icarə əsasında çıxış edir, transfer hüquqları isə “Latsio”ya məxsusdu.
Bu məqam özü də ironik xarakter daşıyır və hələ 2021-ci ildə - Romano Roma klubunun gənclər komandasına düşəndə də diqqəti çəkmişdi. Ona görə ki, “Latsio”nun duçenin sevimli klubu olduğunu hesab edirlər. Sonradan bu mif bir qədər dağıldı – çox güman, Benito heç bir komandaya azarkeşlik etməyib. Amma Mussolininin məhz Romada karyerasını davam etdirməsini heç kim unutmadı.
“Yuve Stabiya”da Romanonun işləri yaxşı gedir - əsas heyətin daimi oyunçusudu, İtaliya kubokunun oyununda da meydana çıxıb. Ancaq müdafiəçi uzun müddət idi qol həsrəti çəkirdi. O, böyüklər arasında ilk dəfə məhz dekabrın 22-də keçirilən “Çezena” ilə oyunda fərqləndi, özü də qələbə topunu vurdu. Tribunalar isə qolu Roma salamı ilə alqışladılar.
“Corriera della Sera”nın yazdığına görə, gənc futbolçunun işləri o qədər yaxşı gedir ki, “Latsio”, çox güman, yayda onu həvəslə düşərgəsinə qaytaracaq. Ancaq futbolçu özü debüt qoluna çox sakit yanaşır:
“Məşqlərdə düşündüyümüz sxemi reallaşdıra bildiyimizə görə çox sevinirəm. Çoxdan ilk qolu vurmağa yaxın idim, nəhayət, bu hadisə baş verdi”.
Mussolininin dediyinə görə, fanatların hərəkəti onu utandırmayıb. Soyadı ilə bağlı məsələlər onu qətiyyən maraqlandırmır. Yeri gəlmişkən, debüt qolunu da ailəsinə həsr etdi. Yaxşı, Romanonun ailəsi kimlərdən ibarətdi?
İş ondadı ki, Mussolinilər ailəsində italiyalı diktator və Adolf Hitlerin İkinci Dünya Müharibəsindəki müttəfini Benitodan başqa məşhur Hollivud aktrisası Sofi Lorenin bacısı Anna-Mariya Şikolone də var. Anna-Mariya “Yuve Stabiya”nın oyunçusunun doğma nənəsidi.
Əlbəttə, Romanonun anasını da xatırlamaq lazımdı. Alessandra Mussolini məşhur italiyalı siyasətçi, neofaşist “Sosial hərəkət” partiyasının yaradıcısı və Avropa Parlamentinin sabiq deputatıdı. Alessandra Benito ilə qohumluq əlaqələriylə qürur duyur, heç vaxt bunu gizlətməyib. Düzdü, baxışlarını oğluna ötürüb-ötürmədiyi məlum deyil.
Əvəzində o dəqiq məlumdu ki, Alessandra Romanonun oyunlarına müntəzəm baş çəkir. Xanım siyasətçi “Çezena” ilə oyunda da stadionda olub və qeyri-real emosiyalar yaşadığını deyib:
“Heç nə danışmaq istəmirəm. Ancaq sifətimə baxsaz, qəlbimdən nələr keçdiyini yaxşı başa düşərsiz. Sevincdən hətta şlyapamı da itirdim”.
Romano etiraf edir ki, siyasət və hətta soyad planında ona heç kim təzyiq göstərmir. Bu mövsüm kürəyində “Mussolini” yazılan forma ilə çıxış edir, ötən mövsüm isə “Floriani M.” yazılan forma daşıyırdı. Floriani Romanonun ikinci soyadıdı, o qədər də məşhur olmayan atasına məxsusdu. Müdafiəçi seçimini belə izah edib:
“Dəyişməyə qərar verdim, çünki futbolkaya iki soyad yerləşmir. Anam mənə adamların danışdıqlarına fikir vermədən öz yolum ilə getməli olduğumu deyir”.
“Yuve Stabiya” “Çezena” üzərindəki qələbə sayəsində B seriyasında 4-cü pillədə qərarlaşıb. 18 turdan sonra bu komandanın hesabında 28 xal var. Mussolininin də formasını geydiyi komanda bu liqada dəyəri ən aşağı olanlardan sayılır – cəmi 13 milyon avro.
Digər xəbərlər
