Bir neçə il öncə Almaniya və dünya futbolunun ən istedadlı gənclərindən sayılan Yussufa Mukokonun adı ətrafında çox böyük bir qalmaqal qopub. Müqavilə ilə Dortmund “Borussiya”sına məxsus olan kamerunəsilli almaniyalı hücumçu bu mövsümü icarə əsasında Fransa təmsilçisi “Nitsa”da keçirir.

Son olayların ardından onun həm indiyəqədərki, həm də bundan sonrakı karyerası sual altına düşüb.

“O, 2004-cü ildə yox, 2000-ci ildə doğulub”
Şənbə günü Almaniyada “Yalan, yalan, yalan – futbol istedadları və milyon dollarlıq biznes” adlı sənədli filmin nümayişi oldu. “ProSieben” kanalının jurnalistləri və prodüserləri tərəfindən araya-ərsəyə gətirilən film son iki il ərzində Mukoko barədə toplanılan məlumatlar əsasında çəkilib. Onlar qeyd edirlər ki, futbol dünyasında “Mukoko kimilər” çoxdu.

Filmdə gənc futbolçunun atası Cozef Mukoko da çıxış edir. Daha doğrusu, bu filmin nümayişinə qədər hər kəs bu şəxsin Yussufa Mukokonun bioloji atası olduğunu düşünürdü. Sən demə, heç də belə deyilmiş. Əvvəlcə onun filmdə dediyi sensasiyalı faktlarla tanış olaq: “Məhkəmədə verdiyim yanlış ifadənin məsuliyyətini dərk edərək qeyd etmək istəyirəm ki, Yussufa Mukoko mənim bioloji oğlum deyil. O, Kamerunda doğulsa da, heç də sənədlərdə qeyd olunduğu kimi 2004-cü il noyabrın 20-də dünyaya göz açmayıb. Biz doğum şəhadətnaməsini dəyişdik və sonra da Almaniya səfirliyindən pasport alaraq onu Almaniyaya gətirdik. Əslində Yussufa 2000-ci il iyulun 19-da doğulub. Onun yaşını 4 il azaldaraq sənədlərdə doğum tarixini 2004-cü il 20 noyabr qeyd etdik”. Aydın səmada şimşək effekti verən və futbol dünyasında ildırım sürəti ilə yayılan bu tarixi etirafdan dərhal sonra Hambur prokurorluğu məsələni araşdırmağa başladı. Düzdü, araşdırmanın ilkin nəticələri ən yaxşı halda gələn həftə açıqlanacaq. Cozef Mukokonun daha bir diqqətçəkən iddiası ondan ibarətdi ki, “Borussiya”nın akademiyasının sabiq rəhbəri Lars Rikkenin, eləcə də də klubun idman direktoru Sebastyan Kelin Yussufanın sənədlərinin saxta olmasından xəbəri var imiş!

Mukokonun “Borussiya” ilə 2026-nın yayına qədər müqaviləsi var. Hələlik müqavilənin vaxtından əvvəl ləğv edilməsi üçün heç bir hüquqi əsas yoxdu. Klubun media direktoru Saşa Fliqqeni dinləyək: “Almaniya hökumətinin verdiyi rəsmi sənədlərdə Yussufanın bioloji valideynlərinin adları qeyd olunub. Həmin sənədlər indiyə qədər də bizdədi. Məhz bu sənədlərin əsasında Mukokonun Almaniya və ya xarici bir klubda, eləcə də gənclər yığmasında oynamasının qarşısında heç bir maneə yoxdu”. Təbii ki, bu, rəsmi açıqlamadı və “Borussiya”nın dərhal Mukokonu yıxıb-sürüyəcəyini gözləmək düzgün olmazdı. Amma “Bild” nəşrinin yazdığına görə, rəhbərlik bu futbolçu ilə bağlı böyük xəyal qırıqlığı yaşayır. Müqavilənin pozulması üçün rəsmi əsas yaranan kimi klub rəsmiləri bunu dərhal müzakirəyə çıxaracaqlar. Digər tərəfdən “arılar”ın Yussufanın meneceri ilə də münasibətləri qaydasında deyil. Həmin menecer bu yay “ilk peşəkar müqavilədən sonra Mukokoya çox şey söz verilmişdi. Amma rəhbərlik müqavilədəki şərtlərə əməl etmədi” deyərək “Borussiya”nı tənqid atəşinə tutmuşdu. Məsələnin bir ucu “Nitsa”ya da toxunur. Mukoko bu mövsüm bu klubda 13 rəsmi oyunda 2 qol, 2 məhsuldar ötürmə ilə fərqlənib. İcarə müddəti gələn il mayın 31-də başa çatacaq. Üstəlik “Nitsa”nın yayda 17 milyon avroya onu daimi əsasda transfer etmək hüququ da var. Amma çətin ki, fransızlar bu hüquqdan yararlansın. Mukoko onsuz da son vaxtlar gününü ehtiyatda keçirirdi. Bu söhbətdən sonra isə onu, ümumiyyətlə, qışda geri göndərməsələr, yaxşıdı.

Rekordların aqibəti necə olacaq?
Bu yerdə qeyd edək ki, aşağı yaş qruplarında sərgilədiyi inanılmaz məhsuldarlıqdan sonra “Borussiya”nın yeni Messisi elan edilən Mukoko bir neçə önəmli rekordun sahibidi. O, dortmundluların U-17 və U-19 komandasında keçirdiyi 81 rəsmi oyunda 137 (!) qol vurmuşdu. Mukoko 2020-ci il noyabrın 21-də, yəni sənəddə qeyd olunan tarixə görə 16 yaş 1 günlüyündə “Herta” ilə oyunda meydana çıxaraq bundesliqa tarixində forma geyən ən gənc futbolçuya çevrilmişdi. Almaniya futbol ictimaiyyətinin səbirsizliklə gözlədiyi an isə dekabrın 18-də baş vermişdi. “Union”la səfər oyununda sonradan meydana çıxaraq 16 yaş 28 günlüyündə fərqlənən Mukoko bundesliqa tarixində qol vuran ən gənc futbolçu ünvanını qazanmışdı. Maraqlıdı ki. hər iki göstəricidə əvvəlki rekord türkiyəli Nuri Şahinə məxsus idi. Və nəhayət, həmin günlərdə bu futbolçu Çempionlar Liqasında da tarixə düşmüşdü. Dekabrın 8-də qrup mərhələsinin “Zenit”lə oyununda 16 yaş 18 günlüyündə meydana çıxmaqla Selestin Babayaroya məxsus rekordu yeniləmiş və turnirin tarixində forma geyən ən gənc futbolçuya çevrilmişdi. Maraqlıdı, görəsən, indi bu rekordların taleyi necə olacaq? Hətta bu rekordlara görə o, Almaniya Futbol İttifaqı (AFİ) tərəfindən gənc oyunçulara verilən “Frits Valter” medalı ilə də təltif olunub. Sonradan “Borussiya”nın əsas komandasında eyni məhsuldarlığı davam etdirə bilməyən və bir qədər gözdən düşən Mukoko həqiqətən 2000-ci il təvəllüddüsə, bu rekordlar və bu medallar ona məxsus olmamalıdı. Hələlik AFİ-nin heç bir rəsmisi bu məsələyə münasibət bildirməyib. Mukokonun 2019-cu ildə imzaladığı və ona ümumilikdə 10 milyon avro qazanc gətirəcəyi güman edilən “Nayk” şirkəti ilə müqavilə də qüvvədədi. Bu şirkət də yəqin ki, araşdırmaya başlayacaq.

Paradoks ondadı ki, Cozef Mukoko 2022-ci il noyabrın 12-də məhkəmədə ifadə verərkən “yanlış ifadənin məsuliyyətini dərk edərək qeyd etmək istəyirəm ki, mən Cozef Mukokoyam və Yussufa mənim bioloji oğlumdu. O, 2004-cü il noyabrın 20-də Kamerunda anadan olub” sözlərini işlətmişdi. Belə vəziyyətdə kimə inanasan? Bir məqam dəqiqdi ki, onun 2 il fasilə ilə verdiyi iki açıqlamadan biri yanlışdı. Buna görə onun cinayət məsuliyyətinə cəlb olunmaq ehtimalı da var. Bir müddət öncə “Bild” iddia etmişdi ki, Mukoko ilə valideynləri arasında ciddi fikir ayrılığı var və onlar uzun müddətdi danışmır. Bəlkə Cozef Mukokonun son açıqlamaları məhz bununla bağlıdı və o, sadəcə oğlundan qisas almaq istəyir? İstənilən halda, bütün suallara yaxın müddətdə aydınlıq gələcək.

ƏLİ RAUFOĞLU hazırladı